უცხოეთშიც კარგად ხვდებიან, რომ რადიკალური ოპოზიციის შანსი ნულია, მიუხედავად იმისა, ისინი შეერთდებიან, გაიყოფიან თუ სხვა ფორმით იქნებიან გადახალისებულად წარმოდგენილები, – განაცხადა „დღის ქრონიკაში“ პარლამენტის გარემოს დაცვისა და ბუნებრივი რესურსების კომიტეტის თავმჯდომარემ, მაია ბითაძემ.
მისი თქმით, თვითგანადგურების ისტორიული მაგალითი გვაქვს, როგორ შეიძლება, ოპოზიციამ ქვეყანაში საკუთარ თავს ბოლო მოუღოს. როგორც მაია ბითაძემ აღნიშნა, ოპოზიციის მიზანია, ქვეყანას საბოლოოდ ბოლო მოუღოს.
„როდესაც რადიკალურ ოპოზიციასა და უცხოეთიდან მათ მხარდამჭერებზე ვსაუბრობთ, ყველას უნდა გვახსოვდეს, რომ მათი უცხოელი მხარდამჭერების რეკომენდაციით ისინი არ შემოვიდნენ პარლამენტში მაშინ, როდესაც 40% ჰქონდათ. ეს იყო იმის ნათელი მაგალითი, რომ მათი უცხოელი დამკვეთების და მხარდამჭერების მიზანი იყო, რომ „ქართული ოცნება“ ძალადობრივი გზით ჩამოეგდოთ ხელისუფლებიდან. ეს პროცესი კვლავ მიმდინარეობს და დღის წესრიგიდან არ მოხსნილა, თუმცა ის ძალა და შემართება, რაც მათ თავიდან ჰქონდათ, დინამიკაში ძალიან მოკლებულია. უცხოეთშიც იმატა იმ პოლიტიკოსების რაოდენობამ, რომლებიც კარგად ხვდებიან, რომ რადიკალური ოპოზიცია უგეგმოები არიან და ქართველი ხალხისთვის შესათავაზებელი არაფერი აქვთ, გარდა იმისა, რომ საქართველო ომში ჩაერთოთ და ამ ქვეყანაში ყველაფერი აერიათ“, – აღნიშნა მაია ბითაძემ.