ორშაბათს, 7 ივლისს, თურქეთის პრეზიდენტი, რეჯეფ თაიფ ერდოღანი პროქურთული „ხალხთა თავისუფლებისა და დემოკრატიის პარტიის“ (DEM) წარმომადგენელ კანონმდებლებს შეხვდა. შეხვედრის მიზანი იყო იმ ნაბიჯებზე მსჯელობა, რომლის გადადგმაც მას შემდეგ გახდა შესაძლებელი, რაც „ქურთისტანის მუშათა პარტიის“ (PKK) მებრძოლებმა ათწლეულების განმავლობაში მიმდინარე ამბოხების დასრულებაზე თანხმობა განაცხადეს. თურქეთში სიდიდით მესამე პარტია DEM-ი მნიშვნელოვან როლს ასრულებს ქვეყნის მთავრობასა და პატიმრობაში მყოფ PKK-ს დამფუძნებელ აბდულა ოჯალანს შორის სამშვიდობო შეთანხმების მიღწევაში, რომლის დაქვემდებარებაში მყოფმა ქურთი მებრძოლების ჯგუფმა ამ კვირის ბოლოს იარაღის დაყრა უნდა დაიწყოს. პრეზიდენტ ერდოღანის ოფისში გამართულ შეხვედრას, რომელიც საათზე მეტხანს გაგრძელდა, ესწრებოდნენ მმართველი „სამართლიანობისა და განვითარების პარტიის“ (AKP) თავმჯდომარის მოადგილე, ეფქან ალა, სადაზვერვო სამსახურის შეფი, იბრაჰიმ კალინი და DEM-ის დეპუტატები, პერვინ ბულდანი და მითჰათ სანკარი. „ჩვენმა დელეგაციამ გამოთქვა თავისი მოსაზრებები და წინადადებები იმ ახალ ეტაპთან დაკავშირებით, რომელშიც შეთანხმების პროცესი შევიდა, აგრეთვე იმის თაობაზე, თუ რა უნდა გაკეთდეს მომავალში“, – ნათქვამია DEM-ის წარმომადგენლების მიერ მოლაპარაკებების დასრულების შემდეგ გაკეთებულ მოკლე განცხადებაში.
„ხალხთა თავისუფლებისა და დემოკრატიის პარტიის“ დეპუტატმა, ბულდანმა შეხვედრას „ისტორიული“ უწოდა. „პროცესი ახალ ფაზაში შედის, რომლის რა დროსაც კონსულტაციების გამართვა აუცილებელია“, – განუცხადა მან ჟურნალისტებს შეხვედრის დაწყებამდე. „კონსულტაციების გავლა საჭირო ნაბიჯების გადასადგმელად არის საჭირო“, – აღნიშნა მან და იქვე დასძინა, რომ შეხვედრის დროს მხარეები „მოსაზრებებს გაცვლიან“. DEM-ის კიდევ ერთი კანონმდებლის, მითჰათ სანკარის თქმით, ახალი ფაზა მეორე მხარისთვისაც „ძალიან მნიშვნელოვანია“, რადგან ისინი ამ შეხვედრას „ჩვენი შეხედულებების მოსასმენად და გასაანალიზებლად“ გამოიყენებენ.
შეხვედრის წინა დღეს, 6 ივლისს, ბულდანმა და სანკარმა „ძალიან პროდუქტიული“ შეხვედრა გამართეს კუნძულ იმრალის ციხეში მყოფ ოჯალანთან. პატიმრობაში მყოფმა 76 წლის PKK-ის დამფუძნებელმა ერდოღანთან დაგეგმილ მოლაპარაკებებს მაღალი შეფასება მისცა და მას „ისტორიულიც“ კი უწოდა. ოჯალანმა ასევე აღნიშნა, რომ საპარლამენტო კომისია, რომლის შექმნაც იგეგმება, სამშვიდობო პროცესის წარმართვაში „მნიშვნელოვან როლს შეასრულებს“. მხარეებს შორის ანკარაში შეხვედრა იმ დროს გაიმართა, როდესაც ოჯალანის პარტია ერაყის ქურთისტანში 10-12 ივლისს დაგეგმილი იარაღის პირველი პარტიის განადგურების ცერემონიისთვის ემზადება.
თავის მხრივ, ერდოღანი მიიჩნევს, რომ ეს ნაბიჯი ახალ იმპულსს მისცემს ქურთებთან სამშვიდობო ძალისხმევას. განიარაღების პროცესი უახლოეს თვეებში, სავარაუდოდ, უფრო სწრაფი ტემპით წარიმართება.