“ნაციონალური მოძრაობიდან” გიორგი ბარამიძე დღეს მესამე პოლიტიკოსი აღმოჩნდა, რომელმაც დაადასტურა, რომ მამუკა ხაზარაძე მიხეილ სააკაშვილის პარტიას საჯაროდ თავდაუსხმელობის სანაცვლოდ ფულს სთავაზობდა. ბრალდებების ადრესატი ხაზარაძე-ჯაფარიძის გუნდი მხოლოდ იმას ამბობს, რომ კოლეგებისთვის პასუხების გაცემას და ოპოზიციის ოპოზიციაში შესვლას არ აპირებს.
“ნაციონალური მოძრაობის” მიერ “ლელოსთვის” წაყენებული ბრალდებები მმართველი გუნდისთვის ოპოზიციაში არსებული პოლიტიკური კორუფციის კიდევ ერთი დასტურია. “ქართული ოცნების” წევრების თქმით, ხელისუფლების ოპონენტები ახლა თავად ალაპარაკდნენ შავი ფულის არსებობაზე, რომელსაც უცხოეთიდან იღებენ.
სააკაშვილისა და ხაზარაძე-ჯაფარიძის პარტიებს შორის დაპირისპირება განხილვის თემაა დანარჩენ ოპოზიციაშიც. “ნაციონალური მოძრაობის” პარტნიორ სტრატეგია აღმაშენებელში” ამბობენ, რომ “ლელოსგან” მსგავსი შეთავაზება თავად არ მიუღიათ, გახარიას გუნდი კი სააკაშვილის პარტიას ცრუ ბრალდებებში ადანაშაულებს.
მმართველი გუნდი დარწმუნებულია, რომ ოპოზიციონერების დაპირისპირება მოსახლეობის შეცდომაში შეყვანის მიზნით უცხოეთში დაწერილი გეგმის ნაწილია. სახელისუფლებო პარტიაში ამბობენ, რომ არც ოპოზიციაში არსებული პოლიტიკური კორუფცია უკვირთ და არც ის ბრალდებები, რომელსაც ხელისუფლების ოპონენტები ერთმანეთს უყენებენ.
ხაზარაძე-ჯაფარიძისა და ყოფილი პრეზიდენტის თანაგუნდელებს შორის დაპირისპირება მას შემდეგ გამწვავდა, რაც “ნაციონალური მოძრაობის” “ფეისბუკ” live-ში, ანა წითლიძემ და ლევან სანიკიძემ მამუკა ხაზარაძე სასარგებლო ეთერებისთვის ფულის გადახდაში ადანაშაულეს. მეორე დღეა, ბრალდებების ადრესატი “ლელო” კოლეგებისგან მტკიცებულებებს ელოდება.