საქართველოს შს სამინისტროს ინფორმაციით, ოთარ წოწორიას ბინაში ჩხრეკა ოპერატიული ინფორმაციის საფუძველზე, ჩატარდა.
შსს-ს განცხადებით, ჩხრეკას ესწრებოდა ადვოკატიც.
“ბინის ჩხრეკა ადვოკატის თანდასწრებით, ოპერატიული ინფორმაციის საფუძველზე, ჩატარდა. ამოღებულია პისტოლეტი და სხვადასხვა კალიბრის ვაზნები. დაინიშნება ექსპერტიზები. გამოძიება სსკ-ს 236-ე მუხლით მიმდინარეობს”,– აცხადებენ შსს-ში.
შეგახსენებთ, რომ ევროსასამართლოს მოსამართლის ნონა წოწორიას ძმის სახლში ჩხრეკა ჩატარდა. სამართალდამცველები იარაღს ეძებდნენ.
ნონა წოწორია 2004-2008 წლებში ზურაბ ადეიშვილის მოადგილე იყო. სტრასბურგის სასამართლოში, ტელეკომპანია “რუსთავი 2”-ის საქმეზე 3 მარტს მიღებულ გადაწყვეტილებას ნაციონალური მოძრაობის ოპონენტები ადგილზე ნონა წოწორიას კავშირებს და გავლენასაც უკავშირებდნენ.
2 მარტს საქართველოს უზენაესი სასამართლოს დიდმა პალატამ ტელეკომპანია “რუსთავი 2” ქიბარ ხალვაშს მიაკუთვნა. 3 მარტს, “რუსთავი 2”-ის მიმართვის საფუძველზე, სტრასბურგის სასამართლომ უზენაესი სასამართლოს გადაწყვეტილების აღსრულება შეაჩერა.
ნონა წოწორია ევროპელ კოლეგებთან ერთად განიხილავდა სტრასბურგის სასამართლოში შს ყოფილი მინისტრის ვანო მერაბიშვილის სარჩელს. ევროპის სასამართლომ მერაბიშვილის წინასწარი პატიმრობა კანონიერად ცნო, თუმცა გადაწყვეტილებაში აღნიშნა, რომ კითხვებს ბადებდა 2013 წლის 14 დეკემბერს მერაბიშვილის საკნიდან სავარაუდო გაყვანის ფაქტი.