„ხალხის ძალის“ საერთაშორისო ურთიერთობების მდივანი ეკა სეფაშვილი ევროპელების წერილს ეხმაურება. ის საგარეო საქმეთა მინისტრების და ევროკომისრის გზავნილს „სამარცხვინოს“ უწოდებს.
„18 ევრობიუროკრატის ეს სამარცხვინო განცხადება არის პირდაპირი თავდასხმა საქართველოს ხელისუფლებაზე, ჩვენი ქვეყნის სუვერენიტეტზე და ქართველი ხალხის არჩევანზე. ეს განცხადება მთელ რიგ უზუსტობას შეიცავს, რასაც „ქართული ოცნების“ პოლიტსაბჭო თანმიმდევრულად პასუხობს.
თუ დავუკვირდებით ამ განცხადებას, გამოდის რომ ისინი ფაქტობრივად უკმაყოფილოები არიან იმით, რომ საქართველოში კანონის უზენაესობა სრულდება და სამართლიანობა, მართლწესრიგი არის შესრულებული იმ დონეზე, როგორც ამას საერთაშორისო სამართალი და თვითონ ევროპის სამართალი მოითხოვს“, – მიიჩნევს სეფაშვილი.
მანამდე 17 ევროპული სახელმწიფოს საგარეო საქმეთა მინისტრებისა და ევროკავშირის უმაღლესი წარმომადგენლის ხელმოწერით გავრცელებულ წერილთან დაკავშირებით განცხადება ქართული ოცნების“ პოლიტსაბჭომ გაავრცელა.