გერმანია უკრაინას მიაწვდის Patriot-ის საჰაერო თავდაცვის სისტემებს, რომლებსაც შეერთებული შტატებისგან შეიძენს. ინფორმაციას ამის შესახებ გამოცემა The Washington Post-ი თეთრი სახლის მაღალჩინოსანზე დაყრდნობით ავრცელებს.
გერმანიის თავდაცვის მინისტრმა, ბორის პისტორიუსმა, რომელიც ამჟამად ვაშინგტონში იმყოფება, ჟურნალისტებს განუცხადა, რომ რამდენიმე კვირის წინ, პენტაგონის ხელმძღვანელ პიტ ჰეგსეტთან ერთად უკრაინის არმიისთვის ორი ერთეული Patriot-ის სისტემის შეძენა შესთავაზა.
მან ასევე მხარი დაუჭირა ტრამპის გადაწყვეტილებას, რომლითაც რუსეთს 50-დღიანი ვადა მისცა სამშვიდობო შეთანხმების მისაღწევად, წინააღმდეგ შემთხვევაში ვაშინგტონი მოსკოვის წინააღმდეგ სერიოზულ სანქციებს დააწესებს.
„ვფიქრობ, ეს სწორი მიდგომაა. მიმაჩნია, რომ მკაფიო მიმართვა, მკაფიო შედეგების მუქარით, საუკეთესო არჩევანია“, – დასძინა მინისტრმა.