„სლოვაკეთი არ იქნება ბრიუსელის ბრმად მხარდამჭერი მანქანა მხოლოდ იმიტომ, რომ ჩეხეთის პრემიერ-მინისტრს, პეტრ ფიალას ასე სურს“, – განაცხადა სლოვაკეთის მმართველი პარტიის, „სმერის“ თავმჯდომარის მოადგილემ, რიჩარდ ტაკაჩმა, ორშაბათს, ჩეხეთის პრემიერ-მინისტრის წერილის საპასუხოდ. ამ უკანასკნელმა სლოვაკ კოლეგას და „სმერის“ ხელმძღვანელს, რობერტ ფიცოს სთხოვა, ანტირუსული სანქციების მეთვრამეტე პაკეტი ევროკავშირის დონეზე არ დაბლოკოს. მანამდე, მსგავსი თხოვნით ფიცოს გერმანიის კანცლერმა, ფრიდრიხ მერცმაც მიმართა.
„ჩვენი ეროვნული ინტერესების დაცვა ჩემთვის, ისევე როგორც ჩვენი მთავრობისთვის, პრაღიდან გამოგზავნილ პოლიტიკურ წერილებზე უფრო მაღლა დგას“, – დაწერა ფეისბუქზე ტაკაჩმა, რომელიც „სმერის“ თავმჯდომარის მოადგილეობასთან ერთად, სლოვაკეთის სოფლის მეურნეობის მინისტრიც არის.
მიუხედავად იმისა, რომ სანქციების დასამტკიცებლად ბლოკის წევრი ქვეყნების ერთსულოვანი თანხმობაა საჭირო, ევროკავშირში რუსული გაზის იმპორტის შეჩერების ზომებზე კენჭისყრა ე.წ. კვალიფიციური უმრავლესობით ხდება. ეს შესაძლებელს გახდის სლოვაკეთის და ასევე უნგრეთის გვერდის ავლით გადაწყვეტილების მიღებას, რომლებსაც ამ საკითხთან დაკავშირებით ერთნაირი პოზიცია უკავიათ.