რუსეთის მიერ უკრაინის ქალაქ ვინიცაზე თავდასხმის შედეგად პოლონური საწარმო დაზიანდა. ამის შესახებ პოლონეთის საგარეო საქმეთა მინისტრმა, რადოსლავ სიკორსკიმ განაცხადა.
როგორც სიკორსკი აცხადებს, რუსეთის მიერ ვინიცაზე განხორციელებული თავდასხმის შედეგად დაზიანდა პოლონური ჯგუფის, Barlinek-ის ქარხანა. მისივე თქმით, არიან დაშავებულებიც.
„საწარმოს ხელმძღვანელმა ახლახან მაცნობა, რომ ეს იყო მიზანმიმართული თავდასხმა სამი მიმართულებიდან. არიან დაშავებულები, მათ შორის ორი მძიმე დამწვრობით. ადგილზე მუშაობენ უკრაინული სამსახურები, ასევე ადგილზე იმყოფებიან ჩვენი საკონსულოს წარმომადგენლები. პუტინის ომი უახლოვდება ჩვენს საზღვრებს“, – განაცხადა სიკორსკიმ.
მედიის ცნობით, Barlinek Group-ი ხის იატაკის დაფებს აწარმოებს.
ბოლო ინფორმაციით, რუსეთის თავდასხმის შედეგად ვინიცაში სულ რვა ადამიანია დაშავებული.