“დიფ სთეითის“ წარმომადგენლები სასურველ შედეგს თუ ვერ იღებენ ხელისუფლებას ეძახიან რუსეთუმეს, რაც ჩვენთან ხდება ახლა იგივე ხდება სხვა ქვეყნებში”

ე.წ. დიფ სთეითის წარმომადგენლები კონკრეტულ ქვეყნებში მათთვის სასურველ შედეგს როცა ვერ იღებენ, შემოაქვთ რუსეთის თემა, ხელისუფლებას ეძახიან რუსეთუმეს. ჩვენთან რაც ხდება ახლა, იგივე ხდება სხვა ქვეყნებშიც, – ამის შესახებ დედაქალაქის მერმა, კახა კალაძემ განაცხადა.

კალაძეს კითხვა დაუსვეს აშშ-ის ეროვნული დაზვერვის დირექტორის, ტულსი გაბარდის განცხადებასთან დაკავშირებით, სადაც გაბარდმა აღნიშნა: „დაზვერვის სფეროში ჯერ კიდევ არსებობს „დიფ სთეითის“ წინააღმდეგობა, გამოჩნდა ინფორმატორი, რომელმაც 2016 წლის არჩევნებთან დაკავშირებით ზოგიერთი კრიტიკული დეტალი მოგვაწოდა. პრეზიდენტმა ობამამ ყალბი ინფორმაციის გამოყენებით შექმნა დასკვნა, მას სურდა, ამერიკელი ხალხისთვის ეჩვენებინა, რომ პუტინი 2016 წლის არჩევნების დროს პრეზიდენტ ტრამპის სასარგებლოდ მოქმედებდა“.

„აშშ-ის პრეზიდენტზე საუბრობდნენ, რომ რუსეთი ეხმარებოდა და რუსული პროექტიაო, რაც წარმოუდგენელია. მხოლოდ საქართველოში არ ხდება ამ ტიპის ქმედებები. მთელ მსოფლიოში ერთი და იგივე ნარატივია. როდესაც ე.წ. დიფ სთეითის წარმომადგენლები კონკრეტულ ქვეყნებში მათთვის სასურველ შედეგს ვერ იღებენ, შემოაქვთ რუსეთის თემა, ხელისუფლებას ეძახიან რუსეთუმეს და ასე შემდეგ. ჩვენთან რაც ხდება ახლა, იგივე ხდება სხვა ქვეყნებშიც. ნახეთ, რა მოხდა რუმინეთში – საპრეზიდენტო კანდიდატი მოხსნეს, რომელსაც უდიდესი შანსი ჰქონდა გამარჯვების. ამას საფუძვლად დაუდეს ის, რომ „ტიკტოკის“ ქსელში უფრო აქტიურად იყო ჩართული, მეტი მხარდამჭერი ჰყავდა და თურმე ეს რუსული თემა ყოფილა. მოლდოვაში ოპოზიციური ტელევიზიები საერთოდ აკრძალეს, ოპოზიციური პარტიები გააუქმეს. ასევე, გერმანიაშიც მიმდინარეობს აქტიური საუბარი, რომ გარკვეული ოპოზიციური პარტიები უნდა გაუქმდეს. პარალელებს თუ გავავლებთ, 2012 წლიდან, როდესაც „ქართული ოცნება“ გამოჩნდა და ბიძინა ივანიშვილმა პოლიტიკაში მოსვლის განაცხადი გააკეთა, იმ დღიდან დაწყებული დღემდე მიმდინარეობს ნარატივი, რომ ხელისუფლება რუსულ საქმეს აკეთებს, რუსულ კანონს იღებს. ეს ყველაფერი არის სისულელე და პირდაპირ შეიძლება ითქვას, რომ ჩვენი გუნდი ქართულ საქმეს აკეთებს, ქართულ სახელმწიფოებრიობას, სუვერენიტეტს, ქართველი ხალხის ინტერესს იცავს. მოცემულობა არის ეს, ხოლო მეორე მხარეს მიმდინარეობს პროპაგანდა. შეგიძლიათ, ნახოთ არქივი და თავად დარწმუნდებით“, – განაცხადა კახა კალაძემ.