„მოულოდნელად ჩამოკრა უბედურების ჟამმა „ნაცმოძრაობაში“, როდესაც გაიგეს, რომ „მეგობარი აქტი“ და მისი განხილვა შეჩერდა. დიდი იმედი გვაქვს, რომ ამერიკასთან ნელ-ნელა დაიწყება გადატვირთვის რეჟიმი. გამომდინარე იქიდან, რომ ეს თავად ამერიკის ინტერესებშიც არის. სწორედ ამიტომ არის, რომ დაიბლოკა ჯანსაღი ძალების მხრიდან ამერიკაში ეს ე.წ. „მეგობარი აქტი“, – ასე ეხმაურება „ხალხის ძალის“ აღმასრულებელი მდივანი გურამ მაჭარაშვილი აშშ-ის სენატში „მეგობარი აქტის“ შეჩერებასთან დაკავშირებით გადაწყვეტილებას.
მისი თქმით, „მეგობარი აქტი“ ეწინააღმდეგება ტრამპის ადმინისტრაციის მიერ გაჟღერებულ პრინციპებს.
„რასაც ტრამპი და მისი ადმინისტრაცია აცხადებს, ეს არის ოჯახური ღირებულება, ეს არის პარტნიორობა, ეს არის სხვა ქვეყანაში პოლიტიკურ პროცესებში ჩაურევლობა და ა.შ. ამის საწინააღმდეგო საკითხები წერია ამ აქტში“, – განაცხადა გურამ მაჭარაშვილმა.
შეგახსენებთ, რომ „მეგობარი აქტის“ მიღება შეჩერებულია, მიზეზი სამი სენატორია, რომლებიც „მეგობარი აქტის“ მიღებას ბლოკავენ. სამივე სენატორი რესპუბლიკელია. მათგან ერთ- ერთი, ამერიკის პრეზიდენტის მეგობარი და ნდობით აღჭურვილი პირია.
ცნობისთვის, „მეგობარი აქტი“ საქართველოს მაღალი თანამდებობის პირებისთვის სანქციებსა და სავიზო შეზღუდვებს ითვალისწინებს. „მეგობარი აქტის“ სახელით ცნობილი კანონპროექტის სრული სახელწოდებაა „საქართველოს ანგარიშვალდებულების, გამძლეობისა და დამოუკიდებლობის შესაძლებლობების გაძლიერებისა და მობილიზაციის აქტი“. ასევე, მისი ოფიციალური სახელწოდებაა „ჩინეთის კომუნისტური პარტიის, ირანის რეჟიმისა და რუსეთის ფედერაციის გავლენის წინააღმდეგ ბრძოლა საქართველოში“. კანონპროექტის ავტორი კონგრესმენი ჯო უილსონია.