ის მხარე, რომელიც ცდილობს ჩვენი მოქალაქეებისთვის უვიზო მიმოსვლის გაუქმებას, მგონია რომ არ ხუმრობს და არის სერიოზული. იყო ვარაუდები, რომ ამბობენ მაგრამ არ გულისხმობენო, საბოლოოდ ჩამოვყალიბდეთ, რომ ისინი ამის გაკეთებას სერიოზულად გულისხმობენ, – განაცხადა „2003-2012 წლებში მოქმედი რეჟიმისა და რეჟიმის პოლიტიკური თანამდებობის პირების საქმიანობის შემსწავლელი დროებითი საგამოძიებო კომისიის“ ხელმძღვანელმა, პარლამენტის ვიცე-სპიკერმა თეა წულუკიანმა გადაცემაში „იმედი LIVE“.
როგორ წულუკიანმა აღნიშნა, თუ საქართველოს უვიზო მიმოსვლას გაუუქმებენ, ეს გადაწყვეტილება პირველ რიგში თვითონ ევროკავშირისთვის იქნება ცუდი.
„ჩვენ სხვა რა დაგვრჩენია, თუ არა ვიყოთ დარწმუნების რეჟიმში, რომ ეს ძალიან ცუდი გადაწყვეტილება იქნება ჩვენი ქვეყნისა და მოქალაქეებისთვის, მაგრამ, პირველ რიგში თვითონ ევროკავშირისთვის. თვითონ ევროკავშირისთვის ისეთი გადაწყვეტილების მიღება, რომელიც ღიად უპირისპირდება ქართველ ხალხს, არ მგონია რომ კარგი იყოს. ამიტომ, თუ ამ გადაწყვეტილებას მიიღებენ იქნება ორმხრივად დამაზიანებელი. ჩვენ ეს გადაწყვეტილება არ გვინდა და თუ ისინი ჩათვლიან, რომ ეს გადაწყვეტილება უნდათ, მაშინ იმის ახსნაც მოუწევთ, რატომ გაუკეთეს ეს ქართველ ხალხს“, – აღნიშნა თეა წულუკიანმა.