თავდაცვისა და უშიშროების საპარლამენტო კომიტეტის თავმჯდომარის პირველი მოადგილე თენგიზ შარმანაშვილი აშშ-ის სენატში „მეგობარი აქტის“ შეჩერებას გამოეხმაურა.
მისი შეფასებით, შეჩერების ინიციატორები ბოლომდე შეუსწავლიან საქართველოსთან ურთიერთობას.
„ისევ ერთი ცენტრიდან მომდინარეობს ყველაფერი, ერთი დირექტივის შესრულებაა და მე მოხარული ვარ, რომ გამოჩნდნენ სენატორები, რომლებმაც ამ აქტის საბოლოოდ მიღება სენატში შეაჩერეს. ვფიქრობ, ესა რ მოხდებოდა ადმინისტრაციის ჩარევის გარეშე, ადმინისტრაციის აზრი მათ გაითვალისწინეს. რა თქმა უნდა, ისინი ბოლომდე შეისწავლიან საქართველოსთან ურთიერთობას და ასე ხელაღებით არ ჩაუგდებენ ნიანგის ხახაში „დიფ სთეითელებს“”, – განაცხადა თენგიზ შარმანაშვილმა.
შეგახსენებთ, რომ „მეგობარი აქტის“ მიღება შეჩერებულია, მიზეზი სამი სენატორია, რომლებიც „მეგობარი აქტის“ მიღებას ბლოკავენ. სამივე სენატორი რესპუბლიკელია. მათგან ერთ-ერთი, ამერიკის პრეზიდენტის მეგობარი და ნდობით აღჭურვილი პირია.
ცნობისთვის, „მეგობარი აქტი“ საქართველოს მაღალი თანამდებობის პირებისთვის სანქციებსა და სავიზო შეზღუდვებს ითვალისწინებს. „მეგობარი აქტის“ სახელით ცნობილი კანონპროექტის სრული სახელწოდებაა „საქართველოს ანგარიშვალდებულების, გამძლეობისა და დამოუკიდებლობის შესაძლებლობების გაძლიერებისა და მობილიზაციის აქტი“. ასევე, მისი ოფიციალური სახელწოდებაა „ჩინეთის კომუნისტური პარტიის, ირანის რეჟიმისა და რუსეთის ფედერაციის გავლენის წინააღმდეგ ბრძოლა საქართველოში“. კანონპროექტის ავტორი კონგრესმენი ჯო უილსონია.