საქართველოს კულტურის სამინისტროსა და „საზოგადოებრივ მაუწყებელს“ შორის ურთიერთთანამშრომლობის მემორანდუმი გაფორმდა.
დოკუმენტს ხელი მოაწერეს საქართველოს კულტურის მინისტრმა თინათინ რუხაძემ და „საზოგადოებრივი მაუწყებლის“ გენერალურმა დირექტორმა თინათინ ბერძენიშვილმა.
მემორანდუმის თანახმად, კულტურის სამინისტრო და „საზოგადოებრივი მაუწყებელი“ ხელს შეუწყობენ ქართული კულტურის, კულტურული მრავალფეროვნების, მათ შორის – კულტურული მემკვიდრეობის ძეგლებისა და ობიექტების პოპულარიზაციას და ამ მიმართულებით ცნობიერების ამაღლებას.
თანამშრომლობა მოიცავს აუდიოვიზუალური ნაწარმოებების – ფილმების, სერიალების, პროგრამების და სხვა პროექტების განხორციელებას, ერთობლივი შემოქმედებითი პროექტების შექმნას და ღონისძიებების ჩატარებას.
მემორანდუმის ხელმოწერას ესწრებოდნენ საქართველოს კულტურის მინისტრის მოადგილე გიორგი მირცხულავა, სამინისტროს კულტურის განვითარებისა და ხელშეწყობის დეპარტამენტის ხელმძღვანელი თათა სვანიძე და კულტურული მემკვიდრეობის დეპარტამენტის უფროსი სალომე ჯამბურია.
