პოლიტიკური სპექტრი საქართველოსთან დაკავშირებით ევროკავშირის პრეს-სპიკერის განცხადებას ეხმაურება. ევროკავშირის საგარეო ქმედებათა სამსახურის გავრცელებულ ტექსტში ნათქვამია, რომ ევროკავშირი გმობს საქართველოს ხელისუფლების მიერ ევროკავშირის როლის შესახებ დეზინფორმაციას და ელჩის მიმართ უსაფუძვლო ბრალდებებს, რაც რუსული სტილის შეთქმულების თეორიებია.
პარლამენტის საპროცედურო საკითხთა კომიტეტის თავმჯდომარის, დავით მათიკაშვილის განცხადებით, “რუსულის” იარლიყის მიკერების გზით, მმართველი გუნდი გაშავებას ცდილობენ.
“საზოგადოებამ ძალიან კარგად იცის წინასაარჩევნოდ, მაგალითად, პაველ ჰერჩინსკი რა განცხადებებით გამოდიოდა და როგორ ერეოდა ქვეყნის შიდა საქმეებში, როგორ მოუწოდებდა საზოგადოებას რადიკალების მხარდაჭერას. ამ ყველაფრის ფონზე, დახმარებისა და მხარდაჭერის წერილი ღიმილისმომგვრელია.
პასუხია გასაცემი ბევრ ლეგიტიმურ კითხვაზე, რომელიც გააჩნია ქართველ ხალხს, ევროპული ფონდებიდან რადიკალების დაფინანსების თვალსაზრისით, ქვეყნის შიდა საქმეში უხეში ჩარევის თვალსაზრისით…
გაცვდა უკვე ტყუილის დაბრალების მიდგომა, რუსულის მიწებების და ამ იარლიყის ქვეშ დისკრედიტაციის მცდელობის. წლებია, ვისმენთ ამ ყველაფერს, როდესაც არანაირი მტკიცებულება არ არსებობს, მაგალითად, სანქციებისთვის გვერდის ავლასთან დაკავშირებით.
არის ბევრი ქვეყანა, რომელიც პირდაპირ მონაწილეობს ამ რთულ პროცესში, ძალიან ბევრჯერ, ქართული მხარე იყო გამართლებული და ვერცერთი ფაქტი ვერ აღმოაჩინეს ამ თვალსაზრისით. ყველაფერი ხდება იმიტომ, რომ არჩევნებია მოახლოებული და სურთ საზოგადოების თვალში მოხდეს მმართველი გუნდის გაშავება”, – განაცხადა დავით მათიკაშვილმა.