უნგრეთი ევროკავშირის ახალ 7-წლიან ბიუჯეტს მხარს არ დაუჭერს, რადგან ის რუსეთთან ომის ლოგიკაზეა აგებული.
ამის შესახებ უნგრეთის პრემიერ-მინისტრმა, ვიქტორ ორბანმა განაცხადა.
„ბრიუსელის ელიტამ წარმოადგინა 7-წლიანი ბიუჯეტის პროექტი, რომელიც ომის ლოგიკაზეა დაფუძნებული. ეს ლოგიკა კი ასეთია: მილიარდები უკრაინისთვის, ნამცეცები – ფერმერებისთვის და განვითარებისთვის. მათი მიზანია რუსეთის დამარცხება, ლიბერალური მოკავშირეების გაძლიერება და გავლენის სფეროს გაფართოება. ჩვენ უარვყოფთ მათ ფანტაზიებს, ჩვენ უარვყოფთ მათ შეთავაზებას – ევროპელები იმსახურებენ კავშირს, რომელიც პირველ ადგილზე მათ ინტერესებს აყენებს“, – წერს ორბანი X პლატფორმაზე.
გამოქვეყნებულ ვიდეოში უნგრეთის პრემიერმა აღნიშნა, რომ ევროკავშირის ახალ ბიუჯეტში ფულის 20 პროცენტი, სავარაუდოდ, უკრაინისთვის გამოიყოფა, ხოლო დანარჩენი დაიხარჯება „არა განვითარებაზე, სოფლის მეურნეობაზე ან ფერმერებზე, არამედ ომისთვის მომზადებაზე“.
„ეს არის ბიუჯეტი იმ ევროკავშირისა, რომელიც რუსეთთან უკრაინის ტერიტორიაზე ომობს. ეს არის ბიუჯეტი იმ ევროკავშირისა, რომელსაც სურს რუსეთის დამარცხება უკრაინის ტერიტორიაზე იმ იმედით, რომ სამხედრო წარუმატებლობა შეარყევს რუსეთის ძალაუფლების სისტემას და ხელისუფლების შეცვლას გამოიწვევს“, – აცხადებს უნგრეთის პრემიერ-მინისტრი.
მისი აზრით, ეს გზას გაუხსნის დღის წესრიგში ლიბერალური პოლიტიკის დაბრუნებას, რის შემდეგაც ევროკავშირი, სავარაუდოდ, რუსეთთან ბიზნეს ურთიერთობების დამყარებას გეგმავს.
„უნგრეთი არ არის დაინტერესებული სამხედრო ბიუჯეტით. ჩვენ გვჭირდება ბიუჯეტი, რომელიც მხარს უჭერს მშვიდობასა და განვითარებას, ამიტომ ამ წინადადებას არც კი განვიხილავთ“, – ამბობს ორბანი.
26 ივლისს ორბანმა უკრაინას შესთავაზა „სტრატეგიული თანამშრომლობა“ კონტრაქტის საფუძველზე, რომელიც შეიძლება `შენარჩუნდეს, შეჩერდეს ან სიტუაციის გათვალისწინებით დარეგულირდეს“. მისი თქმით, უკრაინის ევროკავშირში გაწევრიანება „ომს ევროპის გულში გადაიტანს და ამიტომ, ჩვენი ოჯახები რისკის ქვეშ არ უნდა დადგნენ“.
რა ვიცით უნგრეთის მიერ ევროკავშირში უკრაინის გაწევრიანების დაბლოკვის შესახებ
ევროკავშირში უკრაინის გაწევრიანების შესახებ მოლაპარაკებების გახსნას უნგრეთი 2025 წლის დასაწყისიდან ბლოკავს. ქვეყნის მთავრობა აცხადებს, რომ „უკრაინის ევროკავშირში გაწევრიანება იქნება ტვირთი როგორც ბლოკისთვის, ასევე უნგრეთისთვის“.
უკრაინის იუსტიციის მინისტრის სტეფანიშინას თქმით, კიევი უნგრეთთან შეთანხმდა, რომ 12 მაისიდან დაიწყოს რეგულარული კონსულტაციები უკრაინის ევროკავშირში გაწევრიანების შესახებ მოლაპარაკებების პროცესის განსაბლოკად.
11 მაისს, უნგრეთმა გადადო უკრაინასთან დაგეგმილი მოლაპარაკებები ეროვნული უმცირესობების საკითხზე, რომელიც 12 მაისს უნდა გამართულიყო. უნგრეთის საგარეო საქმეთა სამინისტრომ განმარტა, რომ ამის მიზეზი გახდა კიევის მიერ ბუდაპეშტისთვის ჯაშუშობის თაობაზე წაყენებული ბრალდება.
უნგრეთმა ჩაატარა საკონსულტაციო რეფერენდუმი ევროკავშირში უკრაინის გაწევრიანების მიზანშეწონილობის შესახებ. ბიულეტენში ქვეყნის მთავრობამ დაასახელა უკრაინის ევროკავშირის წევრობით უნგრეთისთვის წარმოქმნილი შვიდი სავარაუდო საფრთხე. რეფერენდუმი უნგრეთში აპრილის შუა რიცხვებში დაიწყო და 20 ივნისამდე გაგრძელდა. მისი შედეგები უნგრეთის მთავრობისთვის სავალდებულო არ არის.
უნგრეთის მთავრობამ ასევე გაუგზავნა წერილი თავის მოქალაქეებს, რომელშიც მოუწოდა უნგრელებს, საკონსულტაციო რეფერენდუმის დროს ხმა ევროკავშირში უკრაინის გაწევრიანების წინააღმდეგ მიეცათ.
2025 წლის ივნისში ორბანმა განაცხადა, რომ ევროკავშირში უკრაინის გაწევრიანების შესახებ საკონსულტაციო რეფერენდუმის შედეგებმა, რომელიც მისმა მთავრობამ ჩაატარა, გაწევრიანების პროცესი შეაჩერა.