სსიპ – დავით აღმაშენებლის სახელობის საქართველოს ეროვნული თავდაცვის აკადემიაში, აკადემიის მაგისტრატურის კურსდამთავრებულთა გამოშვების ცერემონიალი გაიმართა.
ღონისძიებას საპატიო სტუმრის რანგში ესწრებოდნენ თავდაცვის მინისტრის მოადგილე გრიგოლ გიორგაძე, თავდაცვის ძალების მეთაურის მოადგილე გენერალ-მაიორი ირაკლი ჭიჭინაძე და სახელმწიფოს სხვადასხვა უწყებების წარმომადგენლები.
აკადემიის რექტორმა, ბრიგადის გენერალმა მამია ბალახაძემ კურსდამთავრებულებს მიულოცა მაგისტრატურის დასრულება და წარმატებები უსურვა შემდგომ საქმიანობაში.
რექტორმა თავის სიტყვაში ხაზი გაუსვა იმ პროგრესსა და სიახლეებზე, რაც აკადემიაში ხორციელდება და აღნიშნა, რომ „აკადემია მუდმივ რეჟიმში ახორციელებს უკვე არსებული სამაგისტრო პროგრამების განვითარებას და ახალი პროგრამების დამატებას. წელს პირველად მიღება გამოვაცხადეთ ახალ საერთაშორისო ურთიერთობებისა და დიპლომატიის სამაგისტრო პროგრამებზე“.
სიტყვით გამოსვლისას რექტორმა მადლობა გადაუხადა მაგისტრატურის აკადემიურ პერსონალს, პირად შემადგენლობას და კურსდამთავრებულთა ოჯახის წევრებს.
ეროვნული თავდაცვის აკადემიის მაგისტრატურის მიმართულებაზე წარმატებით ხორციელდება თავდაცვის ანალიზის, უსაფრთხოების კვლევებისა და სახელმწიფო რესურსების მართვის სამაგისტრო პროგრამები. აღნიშნული პროგრამები წელს 26 – მა მაგისტრანტმა დაამთავრა.
ღონისძიების დასასრულს რექტორმა მაგისტრატურის პირადი შემადგენლობა და პროფესორ-მასწავლებლები დაკისრებული მოვალეობის კეთილსინდისიერად და მაღალხარისხოვნად შესრულებისთვის სტატუეტებით „დავით აღმაშენებელი“ და ,,საპატიო სიგელი”-თ დააჯილდოვა.
