Agile Spirit 2025-ის ფარგლებში მე-2 ქვეითი ბრიგადის სამედიცინო ასეულმა ვაზიანის პოლიგონზე სამედიცინო საველე სწავლება ჩაატარა. სიმულაციური სცენარის მიხედვით, სამხედრო მედიკოსებმა ბრძოლის ველიდან დაზარალებულის ევაკუაციისა და პირველადი დახმარების აღმოჩენის ამოცანები განახორციელეს.
თავდაცვის სამინისტროს ცნობით, სწავლება მე-2 ქვეითი ბრიგადის სამედიცინო ასეულის საველე ჰოსპიტლის ROLE-2F შესაძლებლობების დახვეწასა და სამედიცინო შესაძლებლობების განვითარებას ისახავდა მიზნად.
სიმულაციური სცენარის მიხედვით, მე-2 ქვეითი ბრიგადის სამხედრო მედიკოსებმა ბრძოლის ველიდან უსაფრთხო რაიონში დაჭრილების ევაკუაცია სამედიცინო ჯავშანმანქანით – „დიდგორი-მედევაკი“ და სამხედრო-სამედიცინო მაღალი გამავლობის ამბულანსით განახორციელეს.
სწავლებაში ჩართული იყო საჰაერო საევაკუაციო საშუალებები: საქართველოს თავდაცვის ძალების შეიარაღებაში არსებული UH-1H „იროკეზის“ ტიპის ვერტმფრენი და თურქეთის რესპუბლიკის ვერტმფრენი „პუმა AS332“.
სწავლების ფარგლებში, ასევე, გაიშალა საველე ჰოსპიტალი ROLE-2F, სადაც მე-2 ქვეითი ბრიგადის სამედიცინო ასეულის მედიკოსებმა დაჭრილი სამხედროს მიღების, პირველადი პროფესიული სამედიცინო დახმარების აღმოჩენისა და დასტაბილურების ამოცანები განახორციელეს.