აშშ-მა საპილოტო პროექტის განხორციელება დაიწყო, რომელიც ტურისტული ვიზების ხუთიდან – თხუთმეტ ათასამდე დოლარის ოდენობის გირაოს სანაცვლოდ გასცემს. ინფორმაციას Reuters-ი ავრცელებს.
სააგენტოს ცნობით, ინიციატივის მთავარ მიზანს სავიზო რეჟიმის დარღვევების შემცირება წარმოადგენს.
როგორც Reuters-ი იუწყება, საკონსულოები თავად გადაწყვეტენ, თუ რა ოდენობის გირაო უნდა გადაიხადოს ადამიანმა, რათა ტურისტული ვიზა მიიღოს. პრიორიტეტი მიენიჭება ისეთ ქვეყნებს, რომელთა მოქალაქეები ყველაზე ხშირად არღვევენ სავიზო რეჟიმის პირობებს და აშშ-ში რჩებიან. აღნიშნული ქვეყნების სია ჯერ არ გამოქვეყნებულა.
საპილოტე პროგრამა 20 აგვისტოს ამოქმედდება და დაახლოებით ერთი წელი გაგრძელდება. ამერიკის ხელისუფლება ელის, რომ ყველაზე ხშირად ტურისტებს ვიზის სანაცვლოდ 10 ათასი დოლარის ოდენობის გირაოს დაუნიშნავენ.
თუ ტურისტული ვიზით ამერიკაში ჩასული ადამიანი ქვეყანას დროზე დატოვებს, მას გირაოს დაუბრუნებენ. სახელმწიფო დეპარტამენტის წინასწარი შეფასებით, ახალი პროგრამა დაახლოებით 2 ათას განმცხადებელს შეეხება.