უკრაინაში ლუგანსკის საოლქო ადმინისტრაციის ყოფილი ხელმძღვანელი სერგეი გაიდაი დააკავეს. ინფორმაციას ამის შესახებ უკრაინული მედია ავრცელებს.
როგორც უკრაინული მედია წერს, ლუგანსკის ოლქისა და ტრანსკარპატიის ოლქის მუკაჩევის რაიონის ყოფილ ხელმძღვანელს კორუფციაში ადანაშაულებენ. უკრაინის უმაღლესმა ანტიკორუფციულმა სასამართლომ გაიდაის წინასწარი ორთვიანი პატიმრობა მიუსაჯა.
ვერდიქტის მიხედვით, ყოფილ მაღალჩინოსანს შეუძლია 2,1 მილიონი ევროს გირაოს საფუძველზე გათავისუფლდეს პატიმრობიდან. გაიდაის ადვოკატებმა სასამართლოს გადაწყვეტილების გასაჩივრების განზრახვის შესახებ განაცხადეს. მათი თქმით, გირაოს თანხა არ შეესაბამება ყოფილი მაღალჩინოსნის შემოსავლებს.
სერგეი გაიდაი 2019-2023 წლებში ხელმძღვანელობდა ლუგანსკის ოლქს. 2024 წლის მარტში ის მუკაჩევის რაიონის მეთაურად დანიშნეს. 2 აგვისტოს მაღალჩინოსანი უკრაინის ეროვნული ანტიკორუფციული ბიუროსა და სპეციალიზებული ანტიკორუფციული პროკურატურის თანამშრომლებმა დააკავეს. მას ბრალად ედება იმ კორუფციულ სქემასთან კავშირი, რომლითაც დრონებისა და რადიოელექტრონული ბრძოლის სხვა საშუალებების გაზრდილი ფასებით შესყიდვა ხდებოდა. 3 აგვისტოს გაიდაი მუკაჩევის რაიონის ხელმძღვანელის თანამდებობიდან გაათავისუფლეს.
გაიდაი უარყოფს დანაშაულს. ის აცხადებს, რომ გაქცევას არსად არ აპირებს და როდესაც გამოძიება და სასამართლო დასრულდება ფრონტზე გაემგზავრება.