კრემლთან დაახლოებულმა წყაროებმა საინფორმაციო სააგენტო Reuters-ს განუცხადეს, რომ რუსეთის პრეზიდენტი, ვლადიმირ პუტინი, სავარაუდოდ, არ დაემორჩილება აშშ-ის პრეზიდენტ დონალდ ტრამპის სანქციების ულტიმატუმს, რომლის ვადაც ამ პარასკევს იწურება, და ის ინარჩუნებს უკრაინის ოთხი რეგიონის მთლიანად დაპყრობის მიზანს.
მანამდე ტრამპმა განაცხადა, რომ რუსეთს ახალ სანქციებს დაუწესებს, ხოლო იმ ქვეყნებს, რომლებიც მის ნავთობს ყიდულობენ – რომელთაგანაც უმსხვილესები ჩინეთი და ინდოეთი არიან – 100%-იან ტარიფებს, თუ პუტინი უკრაინაში რუსეთის ომის შეწყვეტას არ დათანხმდება.
სამი წყაროს ცნობით, პუტინის გადაწყვეტილება, რომ წინსვლა გააგრძელოს, ეფუძნება მის რწმენას, რომ რუსეთი იმარჯვებს და სკეპტიციზმს იმის თაობაზე, რომ აშშ-ის კიდევ ერთ სანქციებს დიდი გავლენა ექნება.
ორმა წყარომ განაცხადა, რომ რუსეთის ლიდერს არ სურს ტრამპის გაბრაზება და აცნობიერებს, რომ შესაძლოა ხელიდან უშვებდეს ვაშინგტონთან და დასავლეთთან ურთიერთობების გაუმჯობესების შანსს, მაგრამ მისი სამხედრო მიზნები უფრო პრიორიტეტულია.
ერთ-ერთი წყაროს თქმით, პუტინის მიზანია სრულად დაიპყროს უკრაინის დონეცკის, ლუგანსკის, ზაპოროჟიეს და ხერსონის რეგიონები, რომლებიც რუსეთმა საკუთარ ტერიტორიებად გამოაცხადა, შემდეგ კი სამშვიდობო შეთანხმებაზე ისაუბროს.