ომის კაბინეტი კვირის ბოლოს შეიკრიბება, მიზეზი ისრაელის პრემიერ-მინისტრის ინიციატივაა, ბენიამინ ნეთანიაჰუ ღაზას სექტორის სრულად დაკავებას გეგმავს. “ცახალის” სამხედროები ოპერაციებს დაიწყებენ იმ რაიონებში, სადაც ტერორისტულ ორგანიზაცია “ჰამასს” ისრაელელი მძევლები ჰყავს გადამალული.
ნეთანიაჰუს ეს განცხადება მას შემდეგ გავრცელდა, რაც ტერორისტულმა ორგანიზაციამ 7 ოქტომბრის თავდასხმის დროს გატაცებული ორი ისრაელელი მძევლის ვიდეოები გამოაქვეყნა. პირველ ვიდეომასალაში 24 წლის მამაკაცს მიწისქვეშა გვირაბში საკუთარ საფლავს ათხრევინებენ. მეორეში კი 22 წლის დაუძლურებული მძევალი, შიმშილის გამო საწოლიდან ადგომას ვერ ახერხებს.
ჰამასის” მძევლების მდგომარეობის შესახებ ისრაელმა გაეროს უშიშროების საბჭოს საგანგებო სხდომა მოიწვია, ნიუ-იორკში გამგზავრებამდე ქვეყნის საგარეო საქმეთა მინისტრმა ჟურნალისტებს უთხრა, რომ ვიდეოების გამოქვეყნების შემდეგ გაეროს არც ერთი განცხადება არ გამოუქვეყნებია, რის გამოც მინისტრმა ორგანიზაცია ღიად გააკრიტიკა.
ღაზის სექტორში ტერორისტებს ამ დრომდე 49 ისრაელელი მძევალი ჰყავთ დატყვევებული. სამშვიდობო მოლაპარაკებები კი ჩიხშია შესული. “ცახალი” კონფლიქტის ზონაში სამხედრო ოპერაციას განაგრძობს, ბოლო ერთი დღის განმავლობაში დარტყმებს 50-ზე მეტი ადამიანი ემსხვერპლა, არიან დაჭრილებიც. ღაზაში ჰუმანიტარული კატასტროფაა.
შიმშილის ფონზე საერთაშორისო საზოგადოება კონფლიქტის ზონაში ჰუმანიტარული ტვირთის მიწოდებას საჰაერო გზით ცდილობს. ღაზას დღეს კანადის სამხედრო თვითმფრინავმა 10 ტონა საკვები პროდუქტი მიაწოდა.