არ ვაპირებ დონალდ ტრამპთან დარეკვას, ბრაზილია ყველა ხელმისაწვდომ რესურსს გამოიყენებს საკუთარი ინტერესების დასაცავად, – ამის შესახებ ბრაზილიის პრეზიდენტმა, ლუის ინასიო ლულა და სილვამ განაცხადა.
როგორც ბრაზილიის პრეზიდენტმა აღნიშნა, აშშ-ის პრეზიდენტს საუბარი არ სურს.
„არ ვაპირებ, დავურეკო დონალდ ტრამპს ვაჭრობის შესახებ, რადგან მას არ სურს საუბარი, მაგრამ შეგიძლიათ, დარწმუნებული იყოთ, დავურეკავ ტრამპს, რომ მოვიწვიო გაერო-ს კლიმატის კონფერენციაზე. მინდა, ვიცოდე, რას ფიქრობს კლიმატის საკითხზე“, – განაცხადა ლუის ინასიო ლულა და სილვამ.
მან ხაზგასმით აღნიშნა, რომ ბრაზილია საკუთარი ინტერესების დასაცავად ყველა ხელმისაწვდომ ზომას მიმართავს.
„ჩვენი ინტერესების დასაცავად ჩვენ ყველა ხელმისაწვდომ ზომას მივმართავთ, დაწყებული ვაჭრობის მსოფლიო ორგანიზაციიდან. ჩვენი მთავრობა უკვე მუშაობდა ჩვენი საგარეო ვაჭრობის გასაძლიერებლად და შიდა კომპანიებისთვის ახალი შესაძლებლობების შესაქმნელად ჯერ კიდევ აშშ-ში ადმინისტრაციის ცვლილებამდე“, – აღნიშნა ლულამ.
გასულ კვირას აშშ-ის პრეზიდენტმა, დონალდ ტრამპმა ბრაზილიისთვის დამატებით 40%-იანი ტარიფის დაწესების შესახებ აღმასრულებელ ბრძანებას მოაწერა ხელი. აღნიშნული გადაწყვეტილება ბრაზილიისთვის დაწესებული ტარიფების საერთო რაოდენობას 50%-მდე ზრდის.