უარი არალეგალურ მიგრაციას, უარი ევროს, – ეს განცხადება პოლონეთის ახალარჩეულმა პრეზიდენტმა, კაროლ ნავროცკიმ საინაუგურაციო სიტყვით გამოსვლისას გააკეთა.
პოლონეთის ახალარჩეული ლიდერის ინაუგურაცია პოლონეთის სეიმის შენობაში გაიმართა. დილიდან შენობასთან შეკრებილები იყვნენ ნავროცკის მხარდამჭერები.
„თავისუფალი ერის თავისუფალმა არჩევანმა მომიყვანა მე აქ, მიუხედავად პროპაგანდისტული კამპანიისა, ტყუილებისა, პოლიტიკური თეატრისა და ზიზღისა. რომელსაც მე შევეჯახე პრეზიდენტის ოფისისკენ გზაზე. მე ვპატიობ, როგორც ქრისტიანი, მე ვპატიობ მთელ ამ ზიზღს. ამ არჩევნების შედეგი ძლიერი გზავნილი იყო, გზავნილი სუვერენული ხალხისგან მთელ პოლიტიკური ელიტას, რომ მმართველობა ძველებურად ვერ გაგრძელდება. პოლონეთი არ უნდა გამოიყურებოდეს ისე, როგორც დღესაა“, – განაცხადა ნავროცკიმ.
თავის გამოსვლაში პოლონეთის ახალმა პრეზიდენტმა დაასახელა ის პრიორიტეტები, რომელსაც პრეზიდენტობის დროს განსაკუთრებულ ყურადღებას მიაქცევს. ნავროცკის თქმით, აუცილებელია სასამართლო სისტემის რადიკალური რეფორმა, რათა პოლონეთში „კანონის უზენაესობა აღდგეს“.
ასევე ნავროცკის თქმით, პოლონეთმა უარი უნდა თქვას არალეგალურ მიგრაციაზე, „უნდა უთხრას დიახ ზლოტის და უარი თქვას ევროზონაში შესვლაზე“. მან ასევე განაცხადა, რომ დაბლოკავს პოლონეთში საპენსიო ასაკის გაზრდის ნებისმიერ მცდელობას.
პოლონეთის ახალმა პრეზიდენტმა ასევე განაცხადა, რომ „პოლონეთი უნდა იყოს ევროკავშირის ნაწილი, მაგრამ არ უნდა გახდეს ევროკავშირი“. მან ხაზი გაუსვა, რომ არ დაეთანხმება კომპეტენციების ევროკავშირისთვის გადაცემას.
კაროლ ნავროცკი პოლონეთის პრეზიდენტის თანამდებობაზე ანჯეი დუდას შეცვლის, რომელიც 5 აგვისტოს ბოლო მიმართვით წარდგა საზოგადოების წინაშე და განაცხადა, რომ გააგრძელებს აქტიურ საქმიანობას, როგორც ქვეყნის შიგნით, ისე საზღვარგარეთაც.