ტეხასის გუბერნატორი 50-ზე მეტი დემოკრატი კანონმდებლის თანამდებობიდან გადაყენებას ითხოვს. რესპუბლიკელებსა და დემოკრატებს შორის კონფლიქტის მიზეზი ტეხასში საარჩვენო ოლქების საზღვრების შეცვლის ინიციატივაა, რომელსაც აქტიურად უჭერს მხარს აშშ-ის პრეზიდენტი დონალდ ტრამპი.
რესპუბლიკელებს სურთ, რომ ტეხასში ხუთი ახალი საარჩვენო ოლქი შექმნან და ამგვარად აშშ-ის კონგრესის ქვედა პალატაში ტეხასელი კონგრესმენების რიცხვი გაზარდონ. ამჟამად წარმომადგენლეთა პალატაში 219 რესპუბლიკელი და 212 დემოკრატი კონგრესმენია, კიდევ ოთხი ადგილი ვაკანტურია.
რესპუბლიკელებს იმედი აქვთ, რომ მომავალ წელს დაგეგმილ კონგრესის შუალედურ არჩევნებამდე, საარჩევნო ოლქების საზღვრების შეცვლის გზით, კონგრესის ქვედა პალატაში პოზიციებს გაიმყარებენ.
თუმცა ტეხასელი დემოკრატები ამ ინიციატივას ბლოკავენ და სწორედ ამიტომ მათ შტატი დატოვეს. მათი უმრავლესობა ილინოისში, ნიუ იორკში და მასაჩუსესტში გაემგზავრა, რათა ტეხასში საარჩევნო ოლქების საზღვრების შეცვლისთვის საჭირო კვორუმი არ შედგეს.
საპასუხოდ, ტეხასის რესპუბლიკელმა გუბერნატორმა, გრეგ ებოტმა ტეხასის უზენაეს სასამართლოს მიმართა და დემოკრატი კანონმდებლის, ჯინ ვუს თანამდებობიდან გადაყენება მოითხოვა, რომელსაც მან „შეთქმულების მეთაური“ უწოდა, რომლის მიზანიც, მისი შეფასებით, შტატის ხელისუფლების მიტაცებაა.
ებოტმა ასევე განაცხადა, რომ მართალია, სარჩელი ვუს წინააღმდეგაა შეტანილი, თუმცა 50 დემოკრატის ტეხასიდან გამგზავრება, მისი შეფასებით, წარმოადგენს „საკუთარი უფლებამოსილების უგულებელყოფას, რის გამოც ისინი თანამდებობიდან უნდა გათავისუფლდნენ“.
„ტეხასელი დემოკრატი კონგრესმენები თავიანთი მოვალეობის შესრულებაზე უარს აცხადებენ და ამას შედეგი უნდა მოჰყვეს. სასამართლოს გადაწყვეტილება დაადგენს, შესაძლებელია თუ არა, ტეხასელების 100 პროცენტს კანონმდებლების მხოლოდ ერთმა მესამედმა უკარნახონ“, – განაცხადა ტეხასის გუბერნატორმა, გრეგ ებოტმა.
ტეხასის კანონმდებლობით, საარჩევნო ოლქების საზღვრების შესაცვლელად საჭიროა ადგილობრივი საკანონმდებლო ორგანოს შემადგენლობის ორი მესამედის დასწრება, თუმცა კვორუმი არ არსებობს, რადგან დემოკრატები აცხადებენ, რომ ტეხასში ორი კვირა არ დაბრუნდებიან, ვიდრე საკანონმდებლო ორგანოს სპეციალური სესია არ დასრულდება.
ცნობითვის, მანამდე ტეხასის საკანონმდებლო ორგანომ გასცა სამოქალაქო ორდერი, რომლითაც შტატიდან გაქცეული დემოკრატები უნდა დააკავონ და ტეხასში დააბრუნონ. დემოკრატების დაკავების განკარგულებას ტეხასში დარჩენილმა 85-მა კანონმდებელმა დაუჭირა მხარი, ხოლო ექვსი წინააღმდეგი იყო. თუმცა აღსანიშნავია, რომ ეს ორდერი მხოლოდ ტეხასის შტატის ტერიტორიაზე მოქმედებს, ხოლო კვორუმის დარღვევა არ წარმოადგენს ისეთ დანაშაულს, რომელშიც ეჭვმიტანილების სხვა შტატებიდან ექსტრადირების მოთხოვნაა შესაძლებელი.