ბრაზილიის პრეზიდენტის, ლუის ინასიო ლულა და სილვას განცხადებით, ყოფილ პრეზიდენტს, ჟაირ ბოლსონარუს ახალი ბრალდებები უნდა წაუყენონ ბრაზილიის წინააღმდეგ აშშ-ის პრეზიდენტის, დონალდ ტრამპის პროვოცირების გამო. ამის შესახებ მან „როიტერთან“ ინტერვიუში განაცხადა.
მისივე თქმით, ეს გავლენას ახდენს ქვეყნის ეკონომიკასა და ბრაზილიელ ხალხზე, რისთვისაც ჟაირ ბოლსონარუ და მისი ვაჟი დაისჯებიან.
„ვფიქრობ, ის სხვა საკითხებშიც უნდა იყოს გასამართლებული, რადგან ახლა ამერიკის შეერთებულ შტატებს ბრაზილიის წინააღმდეგ განაწყობს. ეს გავლენას ახდენს ბრაზილიის ეკონომიკასა და ბრაზილიელ ხალხზე. მის ვაჟს კი სხვა პროცესი უნდა ჰქონდეს და ქვეყნის ღალატისთვის უნდა დაისაჯოს. ისტორიაში არ არსებობს პრეცედენტი, რომ პრეზიდენტმა და მისმა ვაჟმა ამერიკის შეერთებული შტატების პრეზიდენტი ბრაზილიის წინააღმდეგ განაწყეს. ეს არასოდეს მომხდარა მსოფლიოს არცერთი ქვეყნის ისტორიაში“, – აღნიშნა ლუის ინასიო ლულა და სილვამ.
ბრაზილიის პრეზიდენტის თქმით, ყოფილი პრეზიდენტის ვაჟი ამერიკის შეერთებულ შტატებში ტყუილს ავრცელებს იმ მიზნით, რომ ამერიკის შეერთებული შტატების მთავრობა ბრაზილიის წინააღმდეგ განაწყოს.
„ეს ადამიანები ამისთვის დაისჯებიან და ამ ადამიანებმა იციან, რომ გასამართლდებიან. ამას ვერ ავიტანთ. ეს შეუძლებელია, რადგან ბრაზილიას ყოველთვის ჰქონდა ურთიერთობა აშშ-თან“, – განაცხადა ბრაზილიის პრეზიდენტმა.
გასულ კვირას აშშ-ის პრეზიდენტმა, დონალდ ტრამპმა ბრაზილიისთვის დამატებით 40%-იანი ტარიფის დაწესების შესახებ აღმასრულებელ ბრძანებას მოაწერა ხელი. აღნიშნული გადაწყვეტილება ბრაზილიისთვის დაწესებული ტარიფების საერთო რაოდენობას 50%-მდე ზრდის.ტრამპის გადაწყვეტილება უკავშირდება ბრაზილიის მთავრობის მიერ ყოფილი პრეზიდენტის, ჟაირ ბოლსონარუს წინააღმდეგ სისხლისსამართლებრივ დევნას.