ივლისის ბოლოს, ლატვიის სახელმწიფო პოლიციამ რიგაში ორი კურიერი დააკავა, რომლებმაც ერთ-ერთ ქალს, თაღლითური გზით, 170 000 ევროზე მეტი გამოსტყუეს. ამ შემთხვევაში, სატელეფონო თაღლითებმა ეზოთერული ცენტრის სპეციალისტებად გაასაღეს თავი და მოატყუეს ქალი, რომელსაც ჯანმრთელობის პრობლემების გადაჭრის ალტერნატიული მეთოდები შესთავაზეს. მომხდართან დაკავშირებით აღიძრა სისხლის სამართლის საქმე და ორივე ეჭვმიტანილი ამჟამად წინასწარ პატიმრობაში იმყოფება.
რუსეთში მდებარე ეზოთერული ცენტრის შესახებ ინფორმაცია ხანადზმულმა ქალმა ინტერნეტში მოიპოვა და ჯანმრთელობის პრობლემების მოგვარების იმედით, მიმდინარე წლის მაისში ამ „ორგანიზაციას“ დაუკავშირდა.
ეზოთერული ცენტრის წარმომადგენლებმა ქალი დაარწმუნეს, რომ დახმარების გაწევა შეეძლოთ. თაღლითები ქალს მობილური აპლიკაცია „ვოტსაპით“ უკავშირდებოდნენ და მასთან ურთიერთობისთვის, რამდენიმე ანონიმურ ანგარიშს იყენებდნენ.
თაღლითები ქალთან კონტაქტს საკმაოდ დიდხანს, მაისიდან ივლისამდე ინარჩუნებდნენ და მიაღწიეს იმას, რომ მსხვერპლი იმ დროსა და ადგილას ხვდებოდა თაღლითებს, რომელზეც ისინი მიუთითებდნენ, და ფულს გადასცემდა. შედეგად, მათ ქალს 170 000 ევროზე მეტი გამოსძალეს.
სანაცვლოდ, ქალმა მხოლოდ მაგიური რიტუალების ინსტრუქციები მიიღო და გარკვეული დროის შემდეგ მიხვდა, რომ მოატყუეს.
ინციდენტის შესახებ ინფორმაციის მიღებისთანავე, სახელმწიფო პოლიციამ დაუყოვნებლივ დაიწყო სისხლის სამართლის საქმის წარმოება თაღლითობის მუხლით, რომელიც დიდი ოდენობით თანხის გამოძალვას შეეხება ან/და ორგანიზებული ჯგუფის მიერ არის ჩადენილი. ამ შემთხვევაში, კანონი ითვალისწინებს თავისუფლების აღკვეთას ორიდან ათ წლამდე ვადით, ქონების კონფისკაციით ან მის გარეშე და საპრობაციო ზედამხედველობას სამ წლამდე ვადით.
23 ივლისს, ამ დანაშაულისთვის, 2005 და 1992 წლებში დაბადებული უკრაინის ორი მოქალაქე დააკავეს.
დაკავების დღეს, ორი მამაკაცი პოლონეთიდან კვლავ ჩამოვიდა რიგაში, რათა მსხვერპლისგან ნაღდი ფული მიეღოთ. თაღლითებს იმ დღეს კიდევ 35 000 ევროს მიღების იმედი ჰქონდათ.
25 ივლისს სასამართლომ ორივე დაკავებულს, აღკვეთის ღონისძიების სახით, პატიმრობა შეუფარდა.
ამჟამად სამართალდამცავები აგრძელებენ დანაშაულში მონაწილე სხვა პირების იდენტიფიცირებას.
ლატვიის ეროვნულმა პოლიციის განცხადებით, ეს არ არის ერთადერთი შემთხვევა, როდესაც ადამიანებმა ფული იმის გამო დაკარგეს, რომ თაღლითები მათ, სატელეფონო საუბრების დროს, ეზოთერულ მომსახურებას დაპირდნენ.