აშშ-ის პრეზიდენტმა, დონალდ ტრამპმა, თავისი პოლონელი კოლეგის, კაროლ ნავროცკის ფიცის დადების ცერემონიაზე დასასწრებად, ოფიციალური დელეგაცია გაგზავნა მცირე ბიზნესის ადმინისტრაციის ხელმძღვანელის, კელი ლეფლერის მეთაურობით. როგორც პოლონური მედია იტყობინება, ტრამპის ემისრებმა ქვეყნის ახალ პრეზიდენტს საჩუქრად არწივის ქანდაკება გადასცეს.
თეთრმა სახლმა განაცხადა, რომ პოლონეთის პრეზიდენტის ინაუგურაციაზე გასაგზავნი დელეგაცია დონალდ ტრამპმა პირადად დანიშნა. ლეფლერის გარდა, მასში შევიდნენ: ვარშავაში აშშ-ის საელჩოს დროებითი რწმუნებული, დანიელ ლოუტონი; პრეზიდენტის მრჩევლები, ვინსენტ ჰეილი და როს ვორთინგტონი; სახელმწიფო დეპარტამენტის წარმომადგენლები, ჯონ არმსტრონგი, უაიტ ტოელკე და ჯონ ვალჩიკი.
ტელეარხ TVN24-ის ცნობით, ნავროცკიმ ინაუგურაციაზე არწივის ქანდაკება მიიღო, რომელიც მას აშშ-ის დელეგაციამ გადასცა.
პარტია „კანონი და სამართლიანობის“ დეპუტატმა, მარცინ პშიდაჩმა, რომელიც ტრამპის წარგზავნილებს სამშაბათს ბელვედერის სასახლეში შეხვდა, საჩუქარს „უჩვეულო, მაგრამ მისასალმებელი ჟესტი“ უწოდა, რომელიც ორი ქვეყნის „კარგ თანამშრომლობაზე“ მიანიშნებს. მისი თქმით, ნივთი არ უნახავს, მაგრამ უთხრეს, რომ ეს ამერიკული არწივის ემბლემის ასლი იყო.
ნავროცკიმ პრეზიდენტის პოსტი ოთხშაბათს, ეროვნული ასამბლეის ერთობლივ სხდომაზე დაიკავა, რომელსაც პოლონელი ოფიციალური პირები და უცხოელი სტუმრები, მათ შორის აშშ-ის დელეგაცია ესწრებოდნენ.
ნავროცკი ტრამპს წინასაარჩევნო კამპანიის დროს, 2 მაისს შეხვდა. არჩევნების შედეგების გამოცხადების შემდეგ, ტრამპმა მას გამარჯვება მიულოცა და „აშშ-ის მოკავშირე“ უწოდა. საპასუხოდ, ნავროცკიმ აღნიშნა, რომ „შეერთებულ შტატებთან ძლიერი ალიანსი“ მისი ერთ-ერთი პრიორიტეტია.