აშშ-ის პრეზიდენტმა, დონალდ ტრამპმა ხელი მოაწერა აღმასრულებელ განკარგულებას, რომელიც ამკაცრებს ფედერალური გრანტების დამტკიცების პროცესს.
თეთრი სახლის განცხადებით, ამიერიდან გრანტების მინიჭების შესახებ გადაწყვეტილებებს ტრამპის მიერ დანიშნული პირები შეაფასებენ.
ტრამპის ადმინისტრაცია სხვადასხვა სააგენტოსა და საგანმანათლებლო დაწესებულებისთვის ფედერალური დაფინანსების შეწყვეტით იმუქრებოდა.
ეს ეხებოდა მთელ რიგ საკითხებს, მათ შორის, პროპალესტინურ საპროტესტო აქციებს, კლიმატის სფეროში ინიციატივებს, ტრანსგენდერების პოლიტიკასა და მრავალფეროვნების, თანასწორობისა და ინკლუზიის პროგრამებს.
განკარგულების თანახმად, „დისკრეციული გრანტები, შეძლებისდაგვარად, თვალსაჩინოდ უნდა ემსახურებოდეს პრეზიდენტის პოლიტიკურ პრიორიტეტებს“.
განკარგულებაში ასევე ნათქვამია, რომ გრანტების მინიჭების შესახებ გადაწყვეტილებების მიღებაში დარგის ექსპერტებიც იქნებიან ჩართულნი.