მას შემდეგ, რაც პოლონეთის პრეზიდენტად არჩეული კონსერვატორი პოლიტიკოსი, ისტორიკოსი კაროლ ნავროცკი ოთხშაბათს, 6 აგვისტოს, მოვალეობის შესრულებას შეუდგა, საერთაშორისო გამოცემები ქვეყნის შიგნით დაძაბულ პოლიტიკურ თანაცხოვრებას პროგნოზირებენ და გამოდიან გაფრთხილებით, რომ ნავროცკიმ, შესაძლოა, ცენტრისტი პრემიერ-მინისტრის, დონალდ ტუსკის პროევროკავშირული რეფორმები შეაფერხოს და პოლონეთის უფრო ნაციონალისტური გზით წაყვანას შეეცადოს.
ამერიკული „სი-ბი-ეს ნიუსი“ იუწყება, რომ რომ ინაუგურაციამ „შეიძლება პოლონეთი უფრო ნაციონალისტური გზით წაიყვანოს და ცენტრისტული მთავრობის სიცოცხლისუნარიანობაში ეჭვი გააჩინოს“.
კონსერვატორი კათოლიკე პრეზიდენტი, რომელსაც ამერიკელი კოლეგა, დონალდ ტრამპი უჭერს მხარს, „ვაშინგტონ პოსტმა“ დაახასიათა ისეთ ადამიანად, რომელსაც ტუსკის დღის წესრიგის დაბლოკვა შეუძლია, ხოლო გამოცემა „პოლიტიკომ“ აღნიშნა, რომ ის, „სავარაუდოდ, ტუსკის რეფორმების დღის წესრიგის შეფერხებას შეეცდება“.
თავის მხრივ, „როიტერი“ ხაზს უსვამს, რომ ნავროცკის გამარჯვება კონსერვატიულ-პოპულისტურ პარტია „კანონი და სამართლიანობას“ (PiS), რომელიც 2023 წელს არჩევნებში დამარცხდა, მომავალ საპარლამენტო არჩევნებში (2027 წელი) გამარჯვების იმედს უსახავს. „სი-ენ-ენ“-მა კი გაიხსენა ნავროცკის კავშირები ტრამპის MAGA („გავხადოთ ამერიკა კვლავ დიდებული“) მოძრაობასთან და „უკრაინასთან პოტენციურად უფრო ცივი ურთიერთობების“ დამყარება იწინასწარმეტყველა.
ბრიტანულმა „ფაინენშალ თაიმსმა“ მიმოიხილა ქვეყნის პარლამენტში პოლონეთის ახალი პრეზიდენტის წარმოთქმული სიტყვა, რომელშიც მან პირობა დადო, რომ წინააღმდეგობას გაუწევდა სასამართლო რეფორმებს, ეჭვქვეშ დააყენებდა ევროკავშირში ინტეგრაციას და მოითხოვდა კონსტიტუციურ ცვლილებებს ეს გამოსვლა შეაფასა, როგორც „პრეზიდენტის კონფრონტაციულობისა“და ტუსკთან მისი „უხერხული თანაცხოვრების“ მტკიცებულება. გაზეთმა ასევე აღნიშნა, რომ პარლამეტის სხდომათა დარბაზში ნავროცკის შესვლას მემარჯვენე კანონმდებლები შეხვდნენ შეძახილებით „კაროლ!“, რა დროსაც პრემიერ-მინისტრი „უსიცოცხლოდ იჯდა“.
FT-მა ასევე გაავრცელა საპრეზიდენტო არჩევნებში დამარცხების შემდეგ სოციალურ მედიაში ტუსკის მიერ გამოქვეყნებული ერთიანობისკენ მიმართული მისი მოწოდება და პირობა, რომ მინისტრები, როგორც „კონსტიტუციის მცველები“, ისე იმოქმედებდნენ.
ბრიტანულმა გაზეთს არც იმის ხაზგასმა დავიწყებია, რომ ყოფილმა მოკრივემ და მისივე სიტყვებით რომ ვთქვათ, გამოსწორებულმა საფეხბურთო ხულიგანმა, ნავროცკიმ როგორ გამოთქვა ეჭვები ევროკავშირსა და ნატო-ში უკრაინის გაწევრიანებასთან დაკავშირებით, პოლონელების წინააღმდეგ ჩადენილი ომის დროინდელი დანაშაულებების აღიარება მოითხოვა და ამავდროულად, კიევს ომში მხარდაჭერის გაგრძელებას დაჰპირდა.