ალბათ სამარცხვინოა თვითონ ის, ვინც ნებისმიერ სამშვიდობო პოლიტიკას სამარცხვინოს უწოდებს, – ასე გამოეხმაურა საპარლამენტო ფრაქცია „ქართული ოცნების“ თავმჯდომარის პირველი მოადგილე ირაკლი კირცხალია ქართული ოპოზიციის შეფასებებს დონალდ ტრამპისა და ვლადიმერ პუტინის შეხვედრის შესახებ, რომლის სლოგანიც იყო „მშვიდობა მსოფლიოში“.
„სამარცხვინოა ის ძალები, რომლებიც პირდაპირ ჩართულები იყვნენ იმ დამანგრეველ, ამაზრზენ მოწოდებებში, რასაც ერქვა ჩვენი ქვეყნის ომში ჩართვა. ეს ძალაა ე.წ. პოლიტიკური პარტიები, რომლებიც ცეცხლისა და ბომბების წვიმაზე ოცნებობდნენ რუსთაველის გამზირზე, თავიანთი ხელდასხმული არასამთავრობო ორგანიზაციებით, ტელევიზიებითა თუ ვითომ პარტიებით. ეს ის ძალაა, რომელსაც დღეს სირცხვილით იწვის, რომელიც პირდაპირ უცხო ქვეყნის სახელმწიფო შენობებიდან და ინსტიტუციებიდან მოუწოდებდა საქართველოს ომში ჩართვისკენ“, – განაცხადა კირცხალიამ.