“ვაპირებ მხარი დავუჭირო ყველა იმ პროექტს, რომელიც ჩვენს მუნიციპალიტეტში ახალგაზრდებს ხელს შეუწყობს სპორტული, კულტურული და საგანმანათლებლო მიმართულებით”

გორის მუნიციპალიტეტში, ტანას ხეობაში, კონკრეტულად სოფელ ბიისში, მოეწყო საბანაკე სივრცე გორის მუნიციპალიტეტის ბავშვებისათვის. დაახლოებით 400-ზე მეტ ბავშვს მიეცა შესაძლებლობა, ზაფხულის პერიოდში დაესვენა, გასცნობოდა სამთო ტურიზმს, საბანაკე ცხოვრებას, – განაცხადა გორის მუნიციპალიტეტის მერობის კანდიდატმა „ქართული ოცნებიდან“, კონსტანტინე ბუზალაძემ.

ბუზალაძემ მადლობა გადაუხადა ბანაკის ორგანიზატორებს და აღნიშნა, რომ მომავალში მხარს დაუჭერს ყველა იმ პროექტს, რომელიც მუნიციპალიტეტის ახალგაზრდების განვითარებისკენ იქნება მიმართული.

„ბიისის ბანაკის გარდა, გორის მუნიციპალიტეტი ასევე აფინანსებს ბაკურიანის ბანაკს. სამომავლოდ კიდევ ბევრი პროექტი იგეგმება, რომელიც ბავშვებზე, ახალგაზრდებზე მორგებული იქნება.მინდა, მადლობა გადავუხადო ბანაკის ორგანიზატორებს, ყველა იმ ადამიანს, ვინც ბავშვების განწყობაზე ზრუნავდა. სამომავლოდ ვაპირებ, მხარი დავუჭირო ყველა იმ პროექტს, რომელიც განავითარებს ჩვენს მუნიციპალიტეტში ახალგაზრდების ხელშეწყობას სპორტული, კულტურული და საგანმანათლებლო მიმართულებით“, – განაცხადა კონსტანტინე ბუზალაძემ.