“მთელი ქვეყნის მასშტაბით გვინდა, განვაახლოთ და შევქმნათ ახალი სპორტული ინფრასტრუქტურა” (ფოტოები)

მთელი ქვეყნის მასშტაბით გვინდა, განვაახლოთ და შევქმნათ ახალი სპორტული ინფრასტრუქტურა, ეს არის ინვესტიცია არა მხოლოდ მაღალი მიღწევების სპორტში, ეს არის ინვესტიცია ჯანსაღი ცხოვრების წესის დამკვიდრებაში, რაც ძალიან მნიშვნელოვანია ჩვენი ქვეყნისა და საზოგადოებისათვის, – ამის შესახებ საქართველოს პრემიერ-მინისტრმა ირაკლი კობახიძემ საფეხბურთო ცენტრ „ავაზას“ გახსნის ღონისძიებაზე სიტყვით გამოსვლისას განაცხადა.

მთავრობის მეთაურის შეფასებით, ახალი სტადიონი ქართული ფეხბურთის განვითარების ისტორიაში ახალი ფურცელი იქნება.

პრემიერმა საფეხბურთო ცენტრის სრულად განახლებისთვის ფეხბურთის ფედერაციას და თბილისის მერიას მადლობა გადაუხადა.

„სპორტისადმი, და განსაკუთრებით ფეხბურთისადმი, ინტერესი ძალიან მზარდია და ეს არის იმ განსაკუთრებული მიღწევების შედეგი, რომლებიც გვაჩუქეს ჩვენმა ფეხბურთელებმა ბოლო წლების განმავლობაში. ამას სჭირდება მხარდაჭერა და შემდგომი განვითარება. სწორედ ამისათვის მთელი ქვეყნის მასშტაბით შეიქმნება მსგავსი ტიპის ინფრასტრუქტურა. ხელი მოეწერა განკარგულებებს, რომლებიც ითვალისწინებს რამდენიმე ათეული ასეთი საფეხბურთო ცენტრის შექმნას მთელი ქვეყნის მასშტაბით. ჩვენს რეგიონებში აშენდება მულტიფუნქციური სპორტული ცენტრები. ყველა მიმართულებით გვაქვს ამბიციური გეგმები. დარწმუნებული ვარ, ქართული ფეხბურთი და, ზოგადად, ქართული სპორტი კიდევ უფრო დიდ წარმატებებს მიაღწევს და ამისათვის ჩვენ ყურადღებას და ძალისხმევას არ დავიშურებთ“, – განაცხადა ირაკლი კობახიძემ.

საფეხბურთო ცენტრ „ავაზას“ გახსნის ცერემონიის სტუმრებს სიტყვით მიმართეს საქართველოს პრეზიდენტმა მიხეილ ყაველაშვილმა, თბილისის მერმა კახა კალაძემ, სპორტის მინისტრმა შალვა გოგოლაძემ, ფეხბურთის ფედერაციის პრეზიდენტმა ლევან კობიაშვილმა, UEFA-ს ეროვნული ასოციაციების სამმართველოს დირექტორის მოადგილე ტიერი ფავრიმ და FIFA-ს რეგიონულმა კოორდინატორმა მარკო ფერიმ.

პრემიერ-მინისტრმა, პრეზიდენტთან და თბილისის მერთან ერთად, სტადიონი და საფეხბურთო ცენტრის ინფრასტრუქტურა დაათვალიერა. კომპლექსის ტერიტორიაზე მოწყობილია ახალი სტანდარტული და მინიმოედნები ტრიბუნებითა და განათებით, ასევე – ადმინისტრაციული კორპუსი გასახდელებით. ახალი ინფრასტრუქტურის გამოყენებას ბავშვთა ადგილობრივი საფეხბურთო სკოლები და გოგონათა გუნდები უფასოდ შეძლებენ.