„ქართული ოცნების“ თბილისის მერობის კანდიდატმა, კახა კალაძემ დღეს შეხვედრები გამართა „ქართული ოცნება-დემოკრატიული საქართველოს“ საბურთალოს, ვაკის, სამგორის, კრწანისისა და მთაწმინდის რაიონების პარტიული ორგანიზაციის წარმომადგენლებთან.
საუბარი შეეხო წინასაარჩევნო პროცესს, დედაქალაქში მიმდინარე და დაგეგმილ პროექტებს, სამომავლო გეგმებს.
კახა კალაძემ მადლობა გადაუხადა „ქართული ოცნების“ წევრებს, როგორც პარტიული საქმიანობისთვის, ისე ქვეყნის განვითარებაში შეტანილი წვლილისთვის.
„ჩვენ ვართ ამ ქვეყნის რიგითი ჯარისკაცები, ვემსახურებით მის ინტერესებს. რასაკვირველია, საქართველოს სჭირდება პარტნიორები, მეგობრები, ვინც პატივს სცემს ქართველი ხალხის არჩევანს, ქვეყნის სუვერენიტეტს, მაგრამ არა ბატონები და თავიანთი ინტერესების თავზე მომხვევები. რასაკვირველია, ყველას აქვს საკუთარი სტრატეგიული ინტერესი, ისევე როგორც ჩვენ და ზუსტად ვიცით, რა არის საქართველოს განვითარებისთვის აუცილებელი. ესაა გრძელვადიანი მშვიდობა, ჩვენი იდენტობის დაცვა და განვითარება. ჩვენს გასაკეთებელს არავინ გააკეთებს, ამაზე უნდა ვიზრუნოთ თავად და შევქმნათ ჩვენი ქვეყნის მომავლისთვის მყარი საფუძველი. ის კურსი, რომელიც ბიძინა ივანიშვილის ხელმძღვანელობით „ქართულ ოცნებას“ აქვს, გაგრძელდება. მშვიდობას მოაქვს განვითარება, წინსვლა და ეს პოლიტიკა გაგრძელდება“, – აღნიშნა კახა კალაძემ შეხვედრებზე.
პარტიულ ოფისებში გამართულ შეხვედრებს თბილისის საკრებულოში „ქართული ოცნების“ მაჟორიტარობის კანდიდატები დაესწრნენ.