თბილისის მერი კახა კალაძე თხოვნით მიმართავს დედაქალაქში ავარიული კორპუსების მცხოვრებლებს, გამოიყენონ შესაძლებლობა და „ავარიული კორპუსების ჩანაცვლების პროგრამით“ ისარგებლონ.
რაც შეეხება კომერციულ ობიექტებს, თბილისის მერის თქმით, ყველა უნდა დაექვემდებაროს ღონისძიებებს, რომელთაც მუნიციპალური ინსპექცია ახორციელებს.
მერმა ჟურნალისტებთან მუნიციპალური ინსპექციის იმ განცხადებაზე გააკეთა კომენტრი, რომლითაც უწყება ნაძალადევის რაიონში, ერისთავის ქუჩის N26-ში მდებარე ავარიული შენობის მესაკუთრეებს უსაფრთხოების კუთხით დადგენილი ზომების გატარებისკენ მოუწოდებს.
„მინდა, კიდევ ერთხელ ვთხოვო ადამიანებს, რომლებიც ასეთ ავარიულ საცხოვრებელ კორპუსებში იმყოფებიან და ურჩობენ გამოსვლასთან დაკავშირებით: მუნიციპალიტეტი ყველანაირად ხელს შეგიწყობთ, ყველანაირად დაგეხმარებით, ქირით იქნებით უზრუნველყოფილი, რათა ამ ავარიული საცხოვრებელი კორპუსების ნაცვლად, აშენდეს ახალი, თანამედროვე კორპუსები, რომელშიც გარემონტებული ბინები გადმოგეცემათ. გამოიყენეთ ეს შესაძლებლობა, ჩვენი თხოვნაა, ჩაერთეთ მერიის პროგრამაში.
ნაძალადევის რაიონში მდებარე შენობას რაც შეეხება, იქ არა თუ საქმიანობა, გავლაც კი ძალიან დიდ საფრთხეს წარმოადგენდეს. მუნიციპალიტეტს არ აქვს უფლება, ადამიანები იძულებით კომერციული ფართებიდან გამოიყვანოს. აქ საუბარია ადამიანების შეგნებაზე, რომ მხარი დავუჭიროთ ერთმანეთს და გვერდით დავუდგეთ, რათა დავიცვათ უსაფრთხოების ნორმები“, – განაცხადა კახა კალაძემ.