„ქართული ოცნების“ ზუგდიდის მერობის კანდიდატი დათო კოდუა, დადიანების ისტორიულ ბოტანიკურ ბაღში, ზუგდიდელ ახალგაზრდებს შეხვდა.
მერობის კანდიდატმა ახალგაზრდებს სამომავლო გეგმები გააცნო და აღნიშნა, რომ მისი გუნდისთვის უმთავრესი პრიორიტეტი იქნება ახალგაზრდების ჩართულობის უზრუნველყოფა მუნიციპალიტეტის მართვაში, მათი ხედვებისა და იდეების გათვალისწინება.
,,დღეს ზუგდიდელ ახალგაზრდებს დადიანების ისტორიულ ბოტანიკურ ბაღში შევხვდი. ახალგაზრდებთან შეხვედრა ყოველთვის განსაკუთრებული ენერგიით მავსებს, რადგან მათგან მუდმივად მოდის დადებითი ენერგია და ინოვაციური მიდგომები.
საკითხები, რომელზეც დღეს ვისაუბრეთ, იდეები, რომელიც მოვისმინე – ნამდვილად არის მომავლის, განახლებული ზუგდიდისთვის სასიცოცხლოდ მნიშვნელოვანი.
ახალგაზრდული პოლიტიკა ზუგდიდში კიდევ უფრო მეტად გაიზრდება, მეტი ახალგაზრდა მოვა თვითმმართველობაში, რისი ნათელი მაგალითიც საკრებულოს „ქართული ოცნების“ მაჟორიტარობის კანდიდატებია, ჩვენ უმეტესად სწორედ ახალგაზრდები წარვადგინეთ სამაჟორიტარო ოლქებში. რადგან ამ დაუღალავ, იდეებით დახუნძლულ ადამიანებთან ერთად ბევრს გავაკეთებთ ჩვენი ქალაქისა და მუნიციპალიტეტის სოფლებისთვის.
ზუგდიდი ნამდვილად არის ქალაქი, სადაც ბევრი გაკეთდა ახალგაზრდებისთვის: ჩვენ ავაშენეთ ახალგაზრდული ცენტრი, სპორტკომპლექსი, მინი მოედნები, ვახორციელებთ არაერთ ახალგაზრდულ პროექტს, გვაქვს ქვეყნის მასშტაბით ერთ-ერთი საუკეთესო უმაღლესი სასწავლებელი, რომელიც ნამდვილად გამოირჩევა ცოდნის მაღალი დონითა და განახლებული საუნივერსიტეტო ინფრასტრუქტურით – თუმცა ეს საკმარისი არ არის. ამიტომაც ჩვენ გავაძლიერებთ ჩვენი სტუდენტი ახალგაზრდების ხელშეწყობას, როგორც საქართველოში არსებულ უმაღლეს სასწავლებლებში ასევე უცხოეთში”-აღნიშნა დათო კოდუამ.
დათო კოდუას თქმით, ის გეგმავს სტუდენტური პროგრამის განხორციელებას, რომელიც საუკეთესო სტუდენტებს საზღვარგარეთ სწავლის კურსს სრულად დააფინანსებს:
„ჩვენ გვექნება სტუდენტური პროგრამა, რომელიც საუკეთესო სტუდენტების საზღვარგარეთ სწავლის კურსს სრულად დააფინანსებს, ჩვენ გვექნება ერთადერთი პირობა ახალგაზრდებთან, სწავლის დასრულების შემდეგ დაბრუნდნენ ზუგდიდში და მათი განათლება ამ მუნიციპალიტეტის განვითარებას მოახმარონ. ჩვენი ქალაქისადმი მსგავსი მიდგომა უპირველესად წაადგება ამ მუნიციპალიტეტის წინსვლას და განვითარებას.
ჩემს შემთხვევაშიც ასე იყო, უცხოეთში განათლების მიღების შემდეგ აქ დავბრუნდი და შესაძლებლობის მიუხედავად არასდროს მიმიტოვებია ზუგდიდი, ამჯერადაც „ქართული ოცნების“ გუნდის უდიდესი მხარდაჭერით, სწორედ ახალგაზრდებთან ერთად ვგეგმავ ამ ქალაქის მეტ განვითარებას” – აცხადებს დათო კოდუა.