აშშ-ის პრეზიდენტს, დონალდ ტრამპს სურს, რომ უკრაინაში ომი რაც შეიძლება მალე დასრულდეს და მისთვის მნიშვნელობა არ აქვს, როგორ, – წერს ამერიკული გამოცემა The Atlantic-ი აშშ-ის ადმინისტრაციის მაღალჩინოსანზე დაყრდნობით.
გამოცემის ცნობით, ტრამპი ბოლო დღეებში კერძო საუბრებში აღშფოთებას გამოთქვამდა იმის გამო, რომ უკრაინის ომთან დაკავშირებით მისი დიპლომატიური ძალისხმევა არაფრით დასრულდა.
თეთრი სახლის მეთაურის გაღიზიანება გაამძაფრა რუსეთის ზოგიერთმა მოწინააღმდეგემ „რესპუბლიკური“ პარტიის რიგებში – მაგალითად, სენატორმა ლინდსი გრემმა, რომელმაც პრეზიდენტს რუსეთისთვის სანქციების დაწესებისკენ კიდევ ერთხელ მოუწოდა.
გარდა ამისა, წყაროების ცნობით, ტრამპმა გარკვეული იმედგაცრუება გამოთქვა უკრაინის პრეზიდენტ ვოლოდიმირ ზელენსკისა და ევროპის მიმართ და მიაჩნია, რომ მათი მოთხოვნები არარეალისტურია. მისი აზრით, ომის დასასრულებლად უკრაინამ ტერიტორიების ნაწილი უნდა დაკარგოს.
როგორც სტატიაშია ნათქვამი, ამერიკელი და ევროპელი მაღალჩინოსნები თავდაპირველად მიიჩნევდნენ, რომ ომის დასრულების რეალური შანსი გაჩნდა. ტრამპის სპეციალური წარმომადგენელი, სტივ უიტკოფი მოსკოვში ვლადიმირ პუტინს შეხვდა, ტრამპმა რუსეთის პრეზიდენტი შეერთებულ შტატებში პატივით მიიღო, ზელენსკი ევროპელ ლიდერებთან ერთად სასწრაფოდ ჩავიდა ვაშინგტონში. ამის შემდეგ, ნატოს გენერალურმა მდივანმა მარკ რუტემ ოპტიმიზმიც კი გამოთქვა და თქვა, რომ „ტრამპმა პროცესი წინ წაწია“.
თუმცა, დიპლომატიურმა აქტივობამ სიტუაცია არ შეცვალა. პუტინი და ზელენსკი ვერ შეთანხმდნენ ტრამპის მიერ დაპირებულ ერთობლივ შეხვედრაზე. საბრძოლო მოქმედებები დასრულებას არ უახლოვდება, პირიქით: რუსეთმა კვლავ შეუტია კიევს რაკეტებითა და დრონებით, რასაც მსხვერპლი მოჰყვა.
ევროპელი ოფიციალური პირები აღიარებენ, რომ დაბნეულები არიან იმის გამო, რომ არ იციან, რას დაჰპირდა პუტინი ამერიკელებს დახურულ კარს მიღმა, როგორ გაიგეს ეს ვაშინგტონში და რას ნიშნავს ეს სამშვიდობო ძალისხმევისთვის.