ლიეტუვას მომავალი პრემიერ-მინისტრი ინგა რუგინიენე (სოციალ-დემოკრატიული პარტია) თვლის, რომ არაა გამორიცხული სამომავლოდ ქვეყანას საყოველთაო სამხედრო გაწვევის დაბრუნება მოუწიოს. ამჟამად ქვეყანაში წვევამდელებს შემთხვევითობის პრინციპით, ლატარიის საშუალებით ირჩევენ.
„ჩემი აზრით, შესაძლოა ეს თავიდან ვერ ავიცილოთ“, – განაცხადა მან სააგენტო 15min.lt-სთან ინტერვიუში.
წელს სამხედრო სამსახურში 4000-ზე ნაკლები ახალგაზრდაა გაწვეული. წვევამდელები ცხრა თვის განმავლობაში მსახურობენ, თუმცა მომავალი წლიდან მათ უფრო მოკლე, სამი, ექვსი ან ცხრა თვიანი ვადების არჩევა შეეძლებათ.
სამხედრო სამსახურში გაწვევის რეფორმა 18-დან 22 წლამდე ასაკის ახალგაზრდების სწავლის დამთავრების შემდეგ გაწვევას ითვალისწინებს, რამაც ყოველწლიურად გაწვეულთა რაოდენობა უნდა გაზარდოს. ზოგიერთი პოლიტიკოსის თქმით, ეს ქვეყანას საყოველთაო სამხედრო სამსახურის შემოღებასთან აახლოებს.
„უნდა ვაღიარო, რომ ყოველთვის ვუჭერდი მხარს პროფესიონალურ კონტრაქტზე დაფუძნებულ არმიას. მჯერა, რომ მოტივირებულ ადამიანს მთების გადაადგილება შეუძლია. თუმცა, არ შეგვიძლია უგულებელვყოთ თუ სად და როგორ ვითარებაში ვცხოვრობთ“, – თქვა რუგინიენემ.
პრეზიდენტ გიტანას ნაუსედას თქმით სამხედრო სამსახურში საყოველთაო გაწვევის დაბრუნების შემთხვევაში პირველ ჯერზე მხოლოდ მამაკაცების გაწვევა დაიწყება, თუმცა, მან ხაზგასმით აღნიშნა, რომ ლიეტუვა ასეთი ნაბიჯისთვის ჯერ მზად არ არის.