ეს ჩვენი ომი არ არის, შეწყვიტეთ თქვენს ომში ჩვენი ჩათრევის მცდელობა, – ასე გამოეხმაურა უნგრეთის საგარეო საქმეთა მინისტრი პიტერ სიიარტო ანდრეი სიბიგას განცხადებას, სადაც უკრაინის საგარეო საქმეთა მინისტრმა აღნიშნა, რომ უნგრეთი ისტორიის არასწორ მხარეს დგას.
„ეს ჩვენი ომი არ არის. ჩვენ არ ვართ პასუხისმგებელი მასზე, ჩვენ არ დაგვიწყია ის, ჩვენ არ ვმონაწილეობდით. შეწყვიტეთ ჩვენი პროვოცირება, შეწყვიტეთ ჩვენი ენერგეტიკული უსაფრთხოების რისკის ქვეშ დაყენება და შეწყვიტეთ თქვენს ომში ჩვენი ჩათრევის მცდელობა“, – წერს სიიარტო.
შეგახსენებთ, თავდაპირველად უნგრეთის საგარეო საქმეთა მინისტრმა, პიტერ სიიარტომ განაცხადა, რომ ქვეყანაში შესვლა აუკრძალეს იმ უკრაინული სამხედრო დანაყოფის მეთაურს, რომელმაც მილსადენ „დრუჟბაზე“ ბოლო თავდასხმა განახორციელა. ამის შემდეგ უკრაინის საგარეო საქმეთა მინისტრმა, ანდრეი სიბიგამ განაცხადა, რომ ასეთი განცხადებები უსირცხვილოა და უნგრეთი ისტორიის არასწორ მხარეს დგას.