გერმანიის ხელისუფლება საკუთარ მოქალაქეებს ირანის დატოვებისკენ მოუწოდებს და აღნიშნულ ქვეყანაში მოგზაურობისგან თავის შეკავებას ურჩევს. აღნიშნული რეკომენდაცია გერმანიის მთავრობამ ირანის ბირთვულ პროგრამასთან დაკავშირებული ესკალაციის შემდეგ გასცა.
მანამდე ცნობილი გახდა, რომ დიდმა ბრიტანეთმა, საფრანგეთმა და გერმანიამ ირანის წინააღმდეგ გაერო-ს სანქციების აღსადგენად პროცესი დაიწყეს.
ირანის ოფიციალურმა პირებმა ევროპის „სამეული“ დიპლომატიისთვის ზიანის მიყენებაში დაადანაშაულეს და პირობა დადეს, რომ თეირანი ზეწოლას არ დაემორჩილება. მათივე თქმით, ეს გადაწყვეტილება უკანონო და სამწუხაროა.
„ვინაიდან ირანის მთავრობის წარმომადგენლებმა არაერთხელ დაიმუქრეს ამ საკითხთან დაკავშირებით შედეგებით, არ არის გამორიცხული, რომ ირანში მიღებული საპასუხო ზომებმა გერმანიის ინტერესები და მოქალაქეები დააზარალოს. ამჟამად, თეირანში გერმანიის საელჩოს მხოლოდ შეზღუდული საკონსულო დახმარების გაწევა შეუძლია ადგილზე“, – ნათქვამია გერმანიის საგარეო საქმეთა სამინისტროს ვებგვერდზე გამოქვეყნებულ განცხადებაში.