სამი შვილის მამამ ვისკონსინიდან საკუთარი სიკვდილის ინსცენირება მოახდინა, რათა გაქცეულიყო ევროპაში და ახალი ცხოვრება დაეწყო. სტატიას ამ შინაარსით BBC აქვეყნებს.
ბრიტანული ტელეარხის ცნობით, ის უკვე დაკავებულია და 89-დღიანი პატიმრობა აქვს მისჯილი – ზუსტად იმდენი, რამდენი ხანიც მაშველებმა მის ძებნაში გაატარეს.
45 წლის რაიან ბორგვარდტი 2024 წლის აგვისტოში თევზაობის დროს გაუჩინარდა. მან წყალში ამოტრიალებული ნავი, ტელეფონი და პირადობის დამადასტურებელი მოწმობა დატოვა. პოლიცია მას ეძებდა, თუმცა მერე გაარკვია, რომ ის ჯერ კანადაში, ხოლო შემდეგ საქართველოში გაიქცა.
ოფიციალური პირების განცხადებით, ამერიკის მოქალაქე საქართველოში უზბეკ ქალთან შესახვედრად ჩავიდა, რომელიც მან ინტერნეტით გაიცნო.
მას სასამართლომ 89-დღიანი პატიმრობა მართლმსაჯულებისთვის ხელის შეშლის გამო მიუსაჯა. გარდა ამისა, გრინ ლეიქის საოლქო სასამართლოს მოსამართლემ მარკ სლეითმა ბორგვარდტს მაშველებისთვის მის ძებნაზე დახარჯული ხარჯებისა და დროის კომპენსაციის მიზნით 30 ათასი დოლარის ოდენობის ჯარიმა დააკისრა.
განაჩენის გამოტანამდე ბორგვარდტმა მოსამართლეს განუცხადა: „ძალიან ვწუხვარ ჩემი საქციელის გამო, რომელიც მე იმ ღამეს ჩავიდინე და ოჯახსა და მეგობრებს ტკივილი მივაყენე“.
პროკურორების განცხადებით, ამერიკის მოქალაქის საქმე გასული წლის ნოემბერში გაიხსნა, როცა მათ ქალი დაუკავშირდა და ბორგვარდტის ადგილსამყოფლის შესახებ ინფორმაცია მიაწოდა. ბორგვარდტი ამერიკაში დეკემბერში დაბრუნდა. ის დაბრუნებისთანავე დააპატიმრეს.