როცა ამბობენ, მოხსენით ყადაღა, უნდა თქვან, რომ ჩვენ, ევროკავშირმა მივეცით 15 მილიონი არასამთავრობო ორგანიზაციებს და არცერთი თეთრი არ დახარჯულა დესტრუქციული მოქმედებისთვის, – ასე გამოეხმაურა საპარლამენტო უმრავლესობის წევრი თენგიზ შარმანაშვილი საგარეო და უსაფრთხოების პოლიტიკის საკითხებში ევროკავშირის პრესსპიკერის გუშინდელ განცხადებას, რომლითაც ევროკავშირი საქართველოს ხელისუფლებას მოუწოდებს, დაუყოვნებლივ შეცვალოს გადაწყვეტილება დამოუკიდებელი სამოქალაქო ორგანიზაციების საბანკო ანგარიშების გაყინვის შესახებ.
როგორც თენგიზ შარმანაშვილმა აღნიშნა, მიუღებელია ორმაგი სტანდარტები.
„ჩვენთვის ორმაგი სტანდარტების პოლიტიკა მიუღებელია და ამას ვერ ავყვებით. არცერთ სიტყვას არ ამბობენ იმის თაობაზე, რომ ტყუილია, რომ ეს არასამთავრობო ორგანიზაციები ფულს ხარჯავდნენ საქართველოში რევოლუციური სიტუაციების შესაქმნელად. ჩვენ კონკრეტულ შედეგებში ვდებთ ბრალს და ვუთითებთ, რომ ეს ფული არალეგიტიმურად გამოიყენებოდა საქართველოში. არცერთი გამაბათილებელი მტკიცებულება არ მოჰყავთ და უბრალოდ დეკლარირებას ახდენენ, რომ მოხსენით ეს ყადაღა. ეს რომ თქვან, რომ მოხსენით ყადაღა, მაშინ უნდა თქვან, რომ ჩვენ, ევროკავშირმა მივეცით 5-10-15 მილიონი არასამთავრობო ორგანიზაციებს და 15-ვე მილიონი დაიხარჯა ამისთვის და არცერთი თეთრი არ დახარჯულა დესტრუქციული და არალეგიტიმური მოქმედებისთვის, შესაბამისად, გააუქმეთ ეს ყადაღა, მაგრამ ამას არ აკეთებენ“, – განაცხადა შარმანაშვილმა.