როგორც ჩანს, გახარია ხანგრძლივი ემიგრაციისთვის ემზადება, – განუცხადა ჟურნალისტებს პარლამენტის თავდაცვისა და უშიშროების კომიტეტის თავმჯდომარის პირველმა მოადგილემ, თენგიზ შარმანაშვილმა.
მისივე თქმით, თუ რამის გაფუჭება შეეძლო საქართველოში გააფუჭა და იქიდანაც ხელს არ აკლებს ახლა საქართველოში საქმის გაფუჭებას.
„ეს არის მისი პოლიტიკური „სიმამაცის“ მანიშნებელი კიდევ ერთხელ.
ის, პირადად, ყოველთვის გაურბოდა პასუხისმგებლობას. გემახსოვრებათ, ამბობდა, რომ ყველა ბრძანება თვითონ გასცა იმ ცნობილ ღამეს, როდესაც ადამიანებისთვის თვალების დათხრა და სხვა დაზიანებების მიყენება მოხდა. შემდეგ, როდესაც მას პირადად მიაკითხა მართლმსაჯულებამ, რატომღაც შეცვალა ჩვენება. თქვა, რომ საქმის კურსში არ იყო, რომ რეზინისა და პლასტიკური ტყვიების გამოყენებას აპირებდნენ და სხვებს გადააბრალა თავისი ნამოქმედარი. ეს მისი ჩვეული სტილია“, – აღნიშნა თენგიზ შარმანაშვილმა.
არსებული ინფორმაციით, გიორგი გახარიამ გერმანიაში ბინადრობის ნებართვა მიიღო და ბანკში ანგარიშის გახსნასაც ელოდება. გახარიას პარტიაში „ქრონიკის“ შეტყობინებებს არ პასუხობენ, სხვა მედიასაშუალებებთან კი მხოლოდ იმას ამბობენ, რომ მათი ლიდერი სამუშაო ვიზიტით არის წასული.