აშშ-ის პრეზიდენტმა, დონალდ ტრამპმა Daily Caller-თან ინტერვიუში განაცხადა, რომ ვლადიმერ პუტინსა და ვოლოდიმირ ზელენსკის შეხვედრა ახლო მომავალში ნაკლებად სავარაუდოა.
მისივე თქმით, შესაძლოა, ევროპას ამერიკული თვითმფრინავები დასჭირდეს ომის დასრულების უზრუნველსაყოფად.
დონალდ ტრამპის განცხადებით, ომის შესაჩერებლად უსაფრთხოების გარანტიები საჭიროა, თუმცა აღნიშნა, რომ ამერიკელი სამხედროები ბრძოლაში არ ჩაერთვებიან.
„სამმხრივი შეხვედრა მოხდებოდა. ორმხრივი არ ვიცი, მაგრამ სამმხრივი აუცილებლად მოხდება, მაგრამ ზოგჯერ ადამიანები ამისთვის მზად არ არიან. ანალოგს ვიყენებ, რომელიც რამდენჯერმე გამოვიყენე – გყავს შვილი და ეზოში, სათამაშო მოედანზე კიდევ ერთი ბავშვია. მათ ერთმანეთი სძულთ და იწყებენ ხელების ქნევას, გინდა, რომ შეჩერდნენ, თუმცა ისინი ჩხუბს განაგრძობენ. ცოტა ხნის შემდეგ ისინი ძალიან ბედნიერები არიან, რომ ჩერდებიან. გესმით ეს? თითქმის ასეა. ზოგჯერ მათ ცოტა ხანს უწევთ ჩხუბი, ვიდრე შეაჩერებ. მაგრამ ეს დიდი ხანია, გრძელდება. ბევრი ადამიანი დაიღუპა“, – აღნიშნა დონალდ ტრამპმა.