ცესკო-ს თავმჯდომარე გიორგი კალანდარიშვილი, მოადგილე გიორგი შარაბიძესა და ცესკო-ს სპიკერთან, ნათია იოსელიანთან ერთად, თელავის საოლქო საარჩევნო კომისიის მიმდინარე საქმიანობებს და მზადების პროცესს გაეცნო.
ცესკო-ს ცნობით, გიორგი კალანდარიშვილმა სამუშაო შეხვედრა გამართა თელავის საოლქო საარჩევნო კომისიის ხელმძღვანელ პირებთან და კომისიის სრულ შემადგენლობასთან.
„ცესკო-ს თავმჯდომარე დეტალურად გაეცნო პროცესებს, რომელიც 2025 წლის თვითმმართველობის არჩევნებისთვის ხორციელდება. ისაუბრეს საუბნო საარჩევნო კომისიების წევრების პროფესიული გადამზადების პროცესზე და განიხილეს სწავლების ეტაპები, რაც საუბნო კომისიების წევრების სრულ მზადყოფნას უზრუნველყოფს როგორც სამართლებრივ, ისე ტექნოლოგიურ დონეზე, იმისათვის, რომ თითოეული მათგანი მუნიციპალიტეტის ორგანოთა 4 ოქტომბრის არჩევნებზე კვალიფიციურად მოემსახუროს ამომრჩეველს. გიორგი კალანდარიშვილმა შეხვედრაზე ყურადღება გაამახვილა საოლქო საარჩევნო კომისიების მნიშვნელობაზე და მათ როლზე არჩევნების ადმინისტრირების პროცესში. შეხვედრაზე ასევე განიხილეს ამომრჩეველთა ინფორმირებასთან დაკავშირებით განხორციელებული და განსახორციელებელი აქტივობები და ყურადღება გაამახვილეს ამომრჩეველთა ინფორმირების მნიშვნელობასა და აუცილებლობაზე.
თავმჯდომარის მოადგილე გიორგი შარაბიძე, სპიკერ ნათია იოსელიანთან ერთად, თელავში საუბნო საარჩევნო კომისიების სწავლების მეოთხე ეტაპს გაეცნო, რაც კენჭისყრის პროცესის ელექტრონული აპარატებით წარმართვას მოიცავს. სწავლების მონაწილეებთან გიორგი შარაბიძემ ტრენინგების აუცილებლობაზე ისაუბრა და ხაზი გაუსვა საარჩევნო პროცესების ზუსტად და ზედმიწევნით წარმართვის აუცილებლობას, რაც, ჯამში, მაღალპროფესიულ სტანდარტს უზრუნველყოფს“, – ნათქვამია ცესკო-ს მიერ გავრცელებულ ინფორმაციაში.
საარჩევნო ადმინისტრაციაში აცხადებენ, რომ ცესკო-ს ხელმძღვანელი პირები ეტაპობრივად გაეცნობიან ქვეყნის მასშტაბით საოლქო საარჩევნო კომისიების მზადებას მუნიციპალიტეტის ორგანოთა არჩევნებისთვის.