ლიეტუვა, სამხედრო ძალებისა და საზღვრის დაცვის გასაძლიერებლად, ევროკავშირის თავდაცვის დაფინანსების ახალი პროგრამიდან 8 მილიარდ ევრომდე ოდენობის სესხს ითხოვს. ამის შესახებ პრეზიდენტმა გიტანას ნაუსედამ ორშაბათს, 1 სექტემბერს განაცხადა.
ევროკავშირის ბიუჯეტით გამყარებული „ევროპის უსაფრთხოების სამოქმედო პროგრამა“ (SAFE), რომელიც ასევე ცნობილია, როგორც „უსაფრთხოების მოქმედების ინსტრუმენტი ევროპისთვის“, წევრ სახელმწიფოებს თავდაცვის სფეროში ინვესტიციებისთვის 150 მილიარდი ევროს მოცულობის სესხებს სთავაზობს.
„საფრთხეები, რომელთა წინაშეც ვდგავართ, რეალურია: მტრული საბრძოლო დრონები, ჰიბრიდული თავდასხმები და არალეგალური მიგრაციის მუდმივი წნეხი ჩვენს საზღვრებზე. SAFE-ის ინსტრუმენტი ამაზე რეაგირების საშუალებას გვაძლევს“, – განუცხადა ნაუსედამ ჟურნალისტებს ლიეტუვა-ბელარუსის საზღვარზე მდებარე სოფელ მედინინკაიში.
ნაუსედას თქმით, მოთხოვნილი 8 მილიარდი ევროდან 7 მილიარდი ლიეტუვის ახალი სამხედრო დივიზიის შექმნასა და აღჭურვას მოხმარდება, ხოლო 1 მილიარდი – რუსეთთან და ბელარუსთან საზღვრის გამაგრებას („ბალტიის თავდაცვის ხაზის“ ფარგლებში).
ნაუსედას ამ განცხადებამდე ცოტა ხნით ადრე, ფინანსთა სამინისტრომ სააგენტო „ბალტიკ ნიუს სერვისს“ (BNS) განუმარტა, რომ ლიეტუვის განაცხადში მოთხოვნილი სესხის წინასწარი მოცულობა მინიმუმ 5 მილიარდ, ხოლო მაქსიმუმ 8.76 მილიარდ ევროს შეადგენს.
ევროკომისიის პრეზიდენტმა, ურსულა ფონ დერ ლაიენმა ორშაბათს ასევე დაადასტურა, რომ SAFE-ის სესხებისთვის განაცხადი კიდევ 18-მა წევრმა სახელმწიფომ შეიტანა.
„მოხარული ვარ განვაცხადო, რომ ეს ინსტრუმენტი, მთელი 150 მილიარდი ევრო, სრულად არის ათვისებული. ასევე, მოხარული ვარ იმით, რომ ბალტიის სამი ქვეყანა და პოლონეთი უკვე ამზადებენ ერთობლივ შესყიდვებს „აღმოსავლეთის ფარის“ ინიციატივისთვის“, – განაცხადა მან ნაუსედასთან ერთად გამართულ პრესკონფერენციაზე.
ამასთან, ფონ დერ ლაიენმა კიდევ ერთხელ გაიმეორა, რომ რუსეთისა და ბელარუსის მოსაზღვრე ქვეყნები, ევროკავშირის მომდევნო გრძელვადიანი ბიუჯეტის ფარგლებში, დამატებით დაფინანსებას მიიღებენ.
„ევროპის მომდევნო გრძელვადიანი ბიუჯეტის განხილვისას, მიგრაციისა და საზღვრის დაცვის სფეროში ინვესტიციების გასამმაგების ინიციატივით გამოვედით. ასე რომ, ამ თემას დიდი ყურადღება ექცევა“, – დასძინა მან.