ესტონეთის ქალთა შორის ჭადრაკის სამგზის ჩემპიონი, ნარველი მოჭადრაკე ამიერიდან შეჯიბრებებზე რუსეთის სახელით გამოვა. ამ ინფორმაციას რუსულენოვანი პორტალი „დელფი“ ავრცელებს.
ესტონეთის ჭადრაკის ფედერაციის საბჭოს თავმჯდომარის, ვილუ ოცმანის თქმით, 21 წლის ანასტასია სინიცინამ რუსეთში საცხოვრებლად და სასწავლებლად წასვლა გადაწყვიტა და მხოლოდ მას შეუძლია ახსნას, რატომ მიიღო ეს გადაწყვეტილება.
„სამწუხაროა, რომ ახალგაზრდა ნიჭიერმა მოჭადრაკემ, რომლის განვითარებაშიც ესტონეთმა ინვესტიცია ჩადო, ქვეყნის დატოვება და რუსეთში საცხოვრებლად, სასწავლებლად და ჭადრაკის სათამაშოდ წასვლა გადაწყვიტა. ამჟამად ესტონეთში ქალთა ჭადრაკი, მისი არსებობის მანძილზე, საუკეთესო მდგომარეობაშია“, – დასძინა მან.
ჭადრაკის საერთაშორისო ფედერაციის (ფიდე) რეიტინგში სინიცინას ეროვნული მაჩვენებელი დაეცა: რუსეთში ის 28-ე ადგილზეა, ესტონეთში კი მესამე ადგილი ეკავა.
არც „დელფისთვის“ და არც ოცმანისთვის ცნობილი არ არის, მიიღო თუ არა სინიცინამ რუსეთის მოქალაქეობა – თუ მან ეს გააკეთა, ესტონეთის მოქალაქეობაზე უარის თქმა მოუწევს.
„ფედერაცია ნანობს, რომ ასეთი სიტუაცია შეიქმნა“, – დასძინა ოცმანმა.