ერთიან ნაციონალურ მოძრაობასა და ამერიკულ ლობისტურ კომპანიას შორის გაფორმებულ კონტრაქტზე წერს სოციალურ ქსელში „ხალხის ძალის“ წევრი დავით ქართველიშვილი. ლობისტებთან მილიონიანი გარიგების კონტრაქტი FARA-მ გამოაქვეყნა.
დავით ქართველიშვილი აღნიშნავს, რომ კონტრაქტი მოიცავს ლობისტურ მომსახურებას აშშ-ს ხელისუფლებასთან, რაც მოიცავს კონსულტაციების გაწევას და პარტიისთვის დიპლომატიურ აქტივობებში მხარდაჭერის აღმოჩენას.
„როგორც აშშ-დან ხდება ცნობილი, „ერთიანმა ნაციონალურმა მოძრაობამ“ (UNM) 2025 წლის 11 ივლისს ხელშეკრულება გააფორმა ამერიკულ ფირმასთან Nelson Mullins Riley & Scarborough, LLP. კონტრაქტის თანხა შეადგენს 360 000 აშშ დოლარს, ხოლო მოქმედების ვადა ექვსი თვე. ხელშეკრულებას UNM-ის სახელით მოაწერა ხელი პეტრე ცისკარიშვილმა (Petre Tsiskarishvili).
კონტრაქტი მოიცავს ლობისტურ მომსახურებას აშშ-ს ხელისუფლებასთან: კონსულტაციების გაწევას და დახმარებას პარტიის დიპლომატიურ აქტივობებში ამერიკაში. UNM-ს ამ ძალისხმევაში დახმარება უზრუნველყო ორგანიზაციამ „თავისუფალი და სამართლიანი არჩევნები“ საქართველოში.
ფირმა Nelson Mullins წარსულშიც აკეთებდა ლობისტურ შემოწირულობებს ამერიკელ პოლიტიკოსებზე. მათ შორის მოიხსენიება კონგრესმენი ჯო უილსონი (Joe Wilson) სამხრეთ კაროლინიდან, რომელსაც ფირმამ გარკვეული თანხა ამ რამდენიმე ხნის წინათაც “შესწირა”. რა თქმა უნდა, ამ კონკრეტულ შემთხვევაში, ვიყოთ კორექტულები და ობიექტურები: ჯერჯერობით, არ არსებობს პირდაპირი მტკიცებულება, რომ UNM-ის მიერ გადახდილი თანხები პირდაპირ მოხვდა კონგრესმენ ჯო უილსონის კამპანიაში, ან რომ არსებობდა „quid pro quo“-ს (პირდაპირი მომსახურება მხარდაჭერის სანაცვლოდ) ტიპის გარიგება. მართალია, ფირმამ და მისმა წარმომადგენლებმა წარსულში უილსონს გარკვეული თანხები შესწირეს, მაგრამ ეს მოხდა ამ კონკრეტული კონტრაქტის ხელმოწერამდე და არ უკავშირდება უშუალოდ UNM-ის ამ კონკრეტულ თანხებს,“ – წერს დავით ქართველიშვილი.