„თალიბანმა“ უნივერსიტეტების სასწავლო პროგრამაში ქალი ავტორების წიგნები აკრძალა, – ამის შესახებ ინფორმაციას „ბიბისი“ ავრცელებს.
ეს არის ახალი აკრძალვის ნაწილი, რომელიც ასევე ეხება ადამიანის უფლებებისა და სექსუალური შევიწროების შესახებ სწავლას.
ავღანეთის მთავრობამ შარიათისა და „თალიბანის“ პოლიტიკისთვის მიუღებელ წიგნებად 680 ნაშრომი გამოაცხადა, საიდანაც 140 არის ქალების მიერ დაწერილი, მათ შორის, მაგალითად, „უსაფრთხოება ქიმიურ ლაბორატორიაში“.
ქალი ავტორების წიგნების სრული აკრძალვა „ბიბისის“ დაუდასტურა ავღანეთის კომიტეტის წევრმა, რომელიც წიგნებს განიხილავს.
უნივერსიტეტებს ასევე განუცხადეს 18 საგნის სწავლის აკრძალვის შესახებ, რომლებიც, „თალიბანის“ განმარტებით, ეწინააღმდეგება შარიათის პრინციპებს. მათ შორისაა, „გენდერი და განვითარება, „ქალთა როლი კომუნიკაციაშია“ და „ქალთა სოციოლოგია“.
„თალიბანის“ მთავრობის უმაღლესი განათლების სამინისტროს აკადემიური დირექტორის მოადგილემ, ზიაურ რაჰმან არიუბიმ სასწავლებლებისთვის გაგზავნილ წერილში აღნიშნა, რომ გადაწყვეტილება მიღებულია „რელიგიის მეცნიერებისა და ექსპერტების“ კომისიის მიერ.
ქალების მიერ დაწერილი წიგნების გარდა, აკრძალვა შეეხო ირანელი ავტორების წიგნებს.
მანამდე ცნობილი გახდა, რომ „თალიბანმა“ ოპტიკურ-ბოჭკოვანი ინტერნეტი აკრძალა, სულ მცირე, 10 პროვინციაში „ამორალური ქმედებების პრევენციისთვის“.
2021 წელს ავღანეთის სათავეში მოსვლის შემდეგ „თალიბანმა“ არაერთი შეზღუდვა დააწესა, განსაკუთრებით ქალებისთვის. კერძოდ, „თალიბანმა“ აუკრძალა გოგონებს უმაღლეს სკოლებში სწავლა, ქალებს კი – ზოგიერთ სფეროში მუშაობა, დაავალდებულა სახის დაფარვა, ასევე მამაკაცებისთვის სავალდებულო გახდა წვერის მოშვება, მძღოლებს აეკრძალათ მანქანებში მუსიკის ჩართვა.