საფრანგეთის პრეზიდენტი ემანუელ მაკრონი მიიჩნევს, რომ პალესტინის სახელმწიფოს აღიარება არის ერთადერთი გამოსავალი, რომელიც ისრაელს მშვიდობიანი ცხოვრების საშუალებას მისცემს. ამის შესახებ ემანუელ მაკრონმა გაერო-ს გენერალურ ასამბლეაში სიტყვით გამოსვლისას განაცხადა.
„ჩვენ ყველაფერი უნდა გავაკეთოთ ჩვენი ძალისხმევის ფარგლებში, რათა შევინარჩუნოთ ორი სახელმწიფოს შექმნის შესაძლებლობა – ისრაელმა და პალესტინამ გვერდიგვერდ იცხოვრონ მშვიდობიანად და უსაფრთხოდ. პალესტინელი ხალხის უფლებების აღიარება არ ამცირებს ისრაელელი ხალხის უფლებებს, რომელსაც საფრანგეთი პირველივე დღიდან უჭერდა მხარს. საფრანგეთი არასდროს მერყეობდა, ის ყოველთვის იდგა ისრაელის გვერდით, მაშინაც, როდესაც მისი უსაფრთხოება საფრთხის ქვეშ იყო, მათ შორის ირანული ავიადარტყმების დროსაც. პალესტინის სახელმწიფოს აღიარება „ჰამასის“ დამარცხებაა“, – აღნიშნა მაკრონმა.
საფრანგეთის პრეზიდენტმა ასევე მადლობა გადაუხადა იმ ქვეყნებს, რომლებმაც აღიარეს პალესტინის სახელმწიფო.
„არაფერი იქნება შესაძლებელი, თუ პალესტინის ხელისუფლება სრულად არ აიღებს პასუხისმგებლობას ჩვენს განახლებულ მისწრაფებაზე, რათა ბოლოს და ბოლოს მივაღწიოთ ორ სახელმწიფოზე დაფუძნებულ გადაწყვეტას“, – დასძინა მაკრონმა თავის სიტყვაში.