გაერო-ში ისრაელის ელჩი დენი დანონი საფრანგეთის მიერ პალესტინის სახელმწიფოს აღიარებას ეხმაურება. ელჩმა „სქაი ნიუსთან“ ინტერვიუში განაცხადა, რომ „ცარიელი განცხადებები მშვიდობას არ შეუწყობს ხელს, პირიქით, ტერორიზმს წაახალისებს“.
„ეს ხანგრძლივი ომია, რადგან უნდა დავრწმუნდეთ, რომ მშვიდობიან მოსახლეობაში მსხვერპლი მინიმუმამდეა დაყვანილი. შეგვიძლია, ეს ომი ძალიან სწრაფად დავასრულოთ, მაგრამ ჩვენ სამომავლოდ უსაფრთხოების ზომები უნდა მივიღოთ“, – განაცხადა ელჩმა.
დანონმა ასევე აღნიშნა, რომ ისრაელს ღაზაში დარჩენის განზრახვა არ აქვს და ისრაელი წავა, „როდესაც გავიგებთ, რომ „ჰამასი“ იქ აღარ არის“.
„მინდა, შეგახსენოთ, რომ 20 წლის წინ ღაზა მთლიანად დავტოვეთ. ჩვენ პალესტინელებს გასაღებები მივეცით… შეხედეთ, რა მოხდა, „ჰამასმა“ ღაზა აიღო და შემდეგ ჩვენზე თავდასხმა განახორციელა. ჩვენ არ გვინდა იქ დარჩენა, არ გვაქვს იქ დარჩენის განზრახვა, მაგრამ წავალთ, როდესაც გავიგებთ, რომ „ჰამასი“ წასულია. ჩვენ არ შეგვიძლია წასვლა, რათა „ჰამასი“ ხელისუფლებაში დარჩეს“, – განაცხადა ისრაელის ელჩმა გაერო-ში დენი დანონმა.
ცნობისთვის, ცოტა ხნის წინ საფრანგეთის პრეზიდენტმა, ემანუელ მაკრონმა გაერო-ს გენერალურ ასამბლეაზე სიტყვით გამოსვლისას განაცხადა, რომ საფრანგეთმა პალესტინის სახელმწიფო ოფიციალურად აღიარა.